ന്യൂഡല്‍ഹി: മൊബൈല്‍ നമ്പര്‍ ആധാറുമായി ബന്ധിപ്പിക്കുന്നത് സ്റ്റേ ചെയ്യാന്‍ സുപ്രിം കോടതി വിസമ്മതിച്ചു. മൊബൈല്‍ നമ്പര്‍ ആധാറുമായി ബന്ധിപ്പിക്കുന്ന നടപടി ഫെബ്രുവരി ആറിനകം പൂര്‍ത്തിയാക്കുമെന്നാണ് കേന്ദ്ര സര്‍ക്കാര്‍ സുപ്രിംകോടതിയില്‍ അറിയിച്ചത്.

നേരത്തെ ഇത് 2017 ഡിസംബര്‍ 31നകം പൂര്‍ത്തിയാക്കാനായിരുന്നു തീരുമാനിച്ചിരുന്നത്. ആധാര്‍ ബന്ധിപ്പിക്കുന്നതിനുള്ള അവസാന തീയതി കൃത്യമായി ജനങ്ങളെ അറിയിക്കണം.

അതേസമയം, ഈ പേരുപറഞ്ഞ് ജനങ്ങളെ പരിഭ്രാന്തരാക്കരുതെന്ന് മൊബൈല്‍ സേവനദാതാക്കളോടും ബാങ്കുകളോടും ആവശ്യപ്പെട്ടു. ബാങ്ക് അക്കൗണ്ടുകള്‍ മാര്‍ച്ച് 31നകം ആധാറുമായി ബന്ധിപ്പിക്കണം. പുതിയ ബാങ്ക് അക്കൗണ്ട് തുടങ്ങാനും ആധാര്‍ നിര്‍ബന്ധമാക്കിയിട്ടുണ്ട്.

ആധാര്‍ ഇല്ലാത്തതിന്റെ പേരില്‍ ഒരു പട്ടിണി മരണവും ഇന്ത്യയില്‍ നടന്നിട്ടില്ലെന്നും കേന്ദ്ര സര്‍ക്കാരിനു വേണ്ടി ഹാജരായ അഭിഭാഷകന്‍ കോടതിയില്‍ അറിയിച്ചു. ആധാര്‍ കാര്‍ഡ് പാന്‍കാര്‍ഡുമായി ബന്ധപ്പിക്കുന്നത് നിര്‍ബന്ധമാക്കിയ കേന്ദ്ര സര്‍ക്കാര്‍ ഉത്തരവ് സുപ്രിം കോടതി ശരിവച്ചു.