ഈയടുത്തായി മഹാരാഷ്ട്രയിലെ ശിവസേന എം.പി ഒരു പരാമര്‍ശം നടത്തുകയുണ്ടായി. മോദി തരംഗം അവസാനിച്ചുവെന്നും രാഹുല്‍ ഇന്ത്യയെ നയിക്കാന്‍ പ്രാപ്തനാണെന്നുമായിരുന്നു ബി.ജെ.പിയെ ഞെട്ടിച്ച ആ പരാമര്‍ശം. മഹാരാഷ്ട്രയിലും കേന്ദ്രത്തിലും ബി.ജെ.പി യുടെ സഖ്യകക്ഷിയായ ശിവസേന കഴിഞ്ഞ ഏതാനും നാളുകളായി ബി.ജെ.പി ക്കെതിരേ ശക്തമായ വിമര്‍ശനമാണ് അഴിച്ചുവിടുന്നത്. 

ഇതിനുമുമ്പും ഇത്തരം വിമര്‍ശനങ്ങള്‍ ഉണ്ടായിട്ടുണ്ടെങ്കിലും പ്രത്യേകിച്ച്, ഗുജറാത്ത് പോലുള്ള സംസ്ഥാനങ്ങളില്‍ തെരഞ്ഞെടുപ്പു പ്രഖ്യാപിച്ച സാഹചര്യത്തില്‍ ഈ വിമര്‍ശനം വളരെ ചൂടേറിയ രാഷ്ട്രീയചര്‍ച്ചകള്‍ക്കു വഴിയൊരുക്കിയിരിക്കുകയാണ്.
ഇതിനുശേഷം അതിനു മറുപടിയുമായി മഹാരാഷ്ട്ര മുഖ്യമന്ത്രി ഫട്‌നാവിസ് രംഗത്തെത്തുകയും ചെയ്തു. അതുപോലെ തന്നെ ഗുജറാത്ത് തെരഞ്ഞെടുപ്പ് ബി.ജെ.പി ഇന്നേവരെ നേരിട്ടിട്ടില്ലാത്ത തരം പേടിയാണ് അവരെ പിടികൂടിയിട്ടുള്ളത്.
ഒരു ഭാഗത്ത് ജി.എസ്.ടിയും നോട്ട് മാറ്റവും മറ്റേ ഭാഗത്ത് പട്ടേല്‍, ദലിത് പ്രക്ഷോഭങ്ങളും മുറയ്ക്കു നടന്നുകൊണ്ടിരിക്കുന്നു. അതിനിടയില്‍ കോണ്‍ഗ്രസ് പട്ടേല്‍ വിഭാഗക്കാര്‍ക്കു സംവരണം വാഗ്ദാനം ചെയ്യുകയും ചെയ്തു.
പ്രധാനമന്ത്രി മോദിയുടെയും അമിത്ഷായുടെയും തട്ടകമായ ഗുജറാത്തില്‍ പരാജയപ്പെടേണ്ടി വന്നാല്‍ അതു വരുന്ന ലോക്‌സഭാ തെരഞ്ഞെടുപ്പില്‍ വന്‍പ്രകമ്പനം സൃഷ്ടിച്ചേക്കാം.