കൊല്ലം: കൊല്ലം ആശ്രമത്ത് പ്രഷര്‍കുക്കര്‍ പൊട്ടിത്തെറിച്ചു വീട്ടമ്മയായ യുവതിക്ക് പൊള്ളലേറ്റു. കാവടിപ്പുറം സ്വദേശി സൂസന്നാണ് പൊള്ളലേറ്റത്.

സ്‌ഫോടനത്തിനിടെ കുക്കറിലെ കഞ്ഞിവെള്ളം കൈത്തണ്ടയില്‍ വീണാണ് അടുപ്പില്‍നിന്നു കുറച്ചകലെയായി നിന്ന യുവതിക്ക് പൊള്ളലേറ്റത്. പൊള്ളല്‍ ഗുരുതരമല്ല. തലനാരിഴയ്ക്കാണ് അത്യാഹിതം ഒഴിവായത്. ഉച്ചയ്ക്ക് അരി വേവിക്കുന്നതിനിടെയാണ് ഉഗ്രശബ്ദത്തോടെ കുക്കര്‍ പൊട്ടിത്തെറിച്ചത്.

പൊട്ടിത്തെറിയുടെ ആഘാതത്തില്‍ ഗ്യാസ് അടുപ്പിന്റെ ഒരുഭാഗം പൂര്‍ണ്ണമായി തകര്‍ന്നു. കുക്കറിലെ ആവി പോകാനുള്ള സുഷിരങ്ങളും, സേഫ്റ്റി വാല്‍വും അടഞ്ഞ നിലയിലാണെന്ന് പിന്നീട് പരിശോധനയില്‍ വ്യക്തമായി. കുക്കറിന്റെ അടപ്പ് ചെന്നിടിച്ചു മേല്‍ക്കൂരയിലെ രണ്ട് ഷീറ്റുകളും നശിച്ചു. തകര്‍ന്ന അടുപ്പില്‍നിന്നും ഗ്യാസ് ചോര്‍ന്ന് തീപിടിക്കാതിരുന്നതും തുണയായി.