കൊച്ചി :വാട്ടര്‍ അതോറിറ്റിയുടെ കരാര്‍ ജോലിയേറ്റെടുത്ത കമ്പനിക്ക് ലേബര്‍ ചെലവ് പുതുക്കി നല്‍കാനുള്ള ഹൈക്കോടതി നിര്‍ദേശം പാലിക്കാത്ത വാട്ടര്‍ അതോറിറ്റി എം.ഡിയുടെ നടപടി കോടതിയലക്ഷ്യമാണെന്ന് ഡിവിഷന്‍ ബെഞ്ച് വ്യക്തമാക്കി. ചെന്നൈയിലെ എന്‍ജിനീയറിങ് പ്രൊജക്ട്‌സ് ഇന്ത്യ ലിമിറ്റഡിന്റെ സീനിയര്‍ മാനേജര്‍ ശ്രീനേഷ് വാട്ടര്‍ അതോറിറ്റി എം.ഡി ഷൈനമോള്‍ക്കെതിരേ നല്‍കിയ കോടതിയലക്ഷ്യ ഹരജിയിലാണ് ഇക്കാര്യം വ്യക്തമാക്കിയത്.
കരാര്‍ ജോലിയില്‍ ലേബര്‍ ചെലവ് പുതുക്കി നല്‍കാന്‍ സിംഗിള്‍ബെഞ്ച് ഉത്തരവിട്ടിരുന്നു. ഇതിനെതിരേ വാട്ടര്‍ അതോറിറ്റി നല്‍കിയ അപ്പീല്‍ ഡിവിഷന്‍ ബെഞ്ച് തള്ളി. എന്നാല്‍, ലേബര്‍ ചെലവ് പുതുക്കി നല്‍കാമെന്ന് കമ്പനിയുമായുണ്ടാക്കിയ കരാറില്‍ പറഞ്ഞിട്ടില്ലെന്ന് ചൂണ്ടിക്കാട്ടി എം.ഡി ഈ ആവശ്യം വീണ്ടും നിരസിച്ചു. തുടര്‍ന്നാണ് കമ്പനി മാനേജര്‍ കോടതിയലക്ഷ്യ ഹരജി നല്‍കിയത്. ലേബര്‍ ചെലവ് എത്ര ശതമാനം പുതുക്കി നല്‍കാനാവുമെന്ന് തീരുമാനിക്കാനാണ് കോടതി എം.ഡിക്ക് നിര്‍ദേശം നല്‍കിയത്. എന്നാല്‍, അതിന്റെ പേരില്‍ ഡിവിഷന്‍ ബെഞ്ചിന്റെ അപ്പീല്‍ അധികാരിയായി എം.ഡി പ്രവര്‍ത്തിക്കേണ്ടതില്ലെന്നും ഹൈക്കോടതി അഭിപ്രായപ്പെട്ടു. അഭിഭാഷകന്‍ വിശദീകരണത്തിന് സമയം തേടിയതിനെത്തുടര്‍ന്ന് ഒരാഴ്ചത്തെ സമയം ഡിവിഷന്‍ ബെഞ്ച് അനുവദിച്ചിട്ടുണ്ട്.