കോട്ടയം: അന്താരാഷ്ട്ര ഹൂപ്പത്തോണ്‍ ബാസ്‌ക്കറ്റ്‌ബോള്‍ സീരിസിലെ മൂന്നാം മത്സരത്തില്‍ ആസ്‌ത്രേലിയയിലെ റിങ്‌വുഡ് ഹോക്‌സ് ടീമിനെതിരേ കേരള വനിത ഓള്‍ സ്റ്റാര്‍ ടീമിന് ഉജ്ജ്വല വിജയം. കോട്ടയം സ്‌പോര്‍ട്‌സ് കൗണ്‍സില്‍ ഇന്‍ഡോര്‍ സ്റ്റേഡിയത്തിലാണ് പോരാട്ടം അരങ്ങേറിയത്. 64-55നായിരുന്നു കേരളത്തിന്റെ ജയം.
ആദ്യ പാദത്തില്‍ 10-14ന് പിന്നിട്ട് നിന്ന ശേഷം ശക്തമായി തിരിച്ചു വരവ് നടത്തിയാണ് കേരളം ജയിച്ചത്. പകുതി സമയത്തില്‍ 28-25ന് ലീഡോടെ മുന്നേറി. മൂന്നാം പാദത്തില്‍ 48-42ന് ലീഡ് നിലനിര്‍ത്തിയ കേരളം പിന്നീട് വ്യക്തമായ ആധിപത്യത്തോടെയാണ് ജയിച്ചത്.
കേരളത്തിന് വേണ്ടി ടോപ് സ്‌കോററായി 16 പോയിന്റുകളോടെ കളം നിറഞ്ഞ അഞ്ജന പി.ജിക്ക് ഉറച്ച പിന്തുണയുമായി 15 വീതം പോയിന്റുകള്‍ നേടി ക്യാപ്റ്റന്‍ ജീനയും ഗ്രിമ മെര്‍ലിനും മികച്ച കളി പുറത്തെടുത്തു . റിങ്‌വുഡ് ഹോക്‌സിന് വേണ്ടി ഇനിസ്‌ലി 19ഉം അമാന്‍ഡ മീന്‍കിങ് 17ഉം പോയിന്റുകള്‍ നേടി. പരമ്പരയിലെ നാലാം മത്സസരം നാളെ തിരുവനന്തപുരം ജിമ്മി ജോര്‍ജ്ജ് സ്റ്റേഡിയത്തിലും അഞ്ചാം മത്സരം 12ന് കോഴിക്കോട് വി.കെ.എന്‍ മേനോന്‍ ഇന്‍ഡോര്‍ സ്റ്റേഡിയത്തിലും നടക്കും.