ചിബോക്ക്: രണ്ടുവര്‍ഷം മുന്‍പ് തട്ടിക്കൊണ്ടുപോയ പെണ്‍കുട്ടികളുടെ വീഡിയോ നൈജീരിയന്‍ തീവ്രവാദ സംഘമായ ബോക്കോ ഹറം പുറത്തുവിട്ടു. തട്ടിക്കൊണ്ടുപോയവരില്‍ ചിലര്‍ ജീവിക്കുന്നുണ്ടെന്നും ബാക്കിയുള്ളവര്‍ വ്യോമാക്രമണത്തില്‍ കൊല്ലപ്പെട്ടുവെന്നും വെളിപ്പെടുത്തിയാണ് വീഡിയോ പുറത്തുവിട്ടത്.

ചിബോക്കിലെ സര്‍ക്കാര്‍ ഗേള്‍സ് സെക്കണ്ടറി സ്‌കൂളിലെ 276 വിദ്യാര്‍ഥിനികളെയാണ് 2014 ഏപ്രില്‍ 14ന് രാത്രി ബോക്കോ ഹറം തട്ടിക്കൊണ്ടുപോയത്. ഇതില്‍ 57 കുട്ടികള്‍ ഉടനെ രക്ഷപ്പെട്ടിരുന്നു.

യൂടൂബിലാണ് വീഡിയോ പുറത്തുവിട്ടത്. 'അവരുടെ കുട്ടികള്‍ ഞങ്ങളുടെ കയ്യില്‍ തന്നെയുണ്ടാവുമെന്ന് അവര്‍ക്കറിയാം' എന്ന് മുഖംമറച്ച ഒരു ഭീകരന്‍ വീഡിയോയില്‍ പറയുന്നുണ്ട്. നൈജീരിയന്‍ സര്‍ക്കാര്‍ ജയിലിലടച്ച ബോക്കോ ഹറം അംഗങ്ങളെ മോചിപ്പിക്കണമെന്നാണ് ഇവരുടെ ആവശ്യം.