മങ്കട: ആളൊഴിഞ്ഞ വീടുകള്‍ കേന്ദ്രീകരിച്ച് മോഷണം വ്യാപകമാകുന്നതായി പരാതി. അവധിദിനങ്ങളില്‍ വീട്ടുകാര്‍ വിരുന്നിനു പോകുന്ന വീടുകള്‍ കേന്ദ്രീകരിച്ചാണ് മോഷണം നടത്തുന്നത്. കഴിഞ്ഞദിവസം മങ്കടപള്ളിപ്പുറം വെണ്ണക്കോട്ട് അടച്ചിട്ട രണ്ടണ്ടു വീടുകള്‍ കുത്തിത്തുറന്നു മോഷണം നടത്തി. വെണ്ണക്കോട്ട് കൊളപ്പറമ്പ് റോഡില്‍ തട്ടായില്‍ മുഹമ്മദ് സാലിം, കെ.പി അബ്ദുല്‍ ജലീല്‍ എന്നിവരുടെ വീടുകളാണ് പ്രധാനവാതിലുകളുടെ പൂട്ടുകള്‍ തകര്‍ത്ത് അകത്ത് കയറി മോഷണം നടത്തിയത്. അവധി ദിവസം വീട്ടുകാര്‍ വിരുന്നിനു പോയ രാത്രിയിലായിരുന്നു സംഭവം. സാലിമിന്റെ വീട്ടില്‍ പെട്ടിയില്‍ സൂക്ഷിച്ച 3,000 രൂപയും സ്വര്‍ണവും മോഷണം പോയി. രാത്രിയില്‍ ഒരേ സമയത്താണ് വിവിധ സ്ഥലങ്ങളിലെ വീടുകളില്‍ മോഷണശ്രമം നടക്കുന്നതെന്നും ദിവസങ്ങളായി പ്രദേശത്ത് വേറെയും മോഷണ ശ്രമങ്ങളുണ്ടായതായും നാട്ടുകാര്‍ പരാതിപ്പെട്ടു. മലപ്പുറം പൊലിസ് വീടുകളിലെത്തി തെളിവുകള്‍ ശേഖരിച്ചു.