പേരാമ്പ്ര: കക്കയത്ത് കെ.എസ.്ഇ.ബി കോളനി പരിസരത്ത് വെച്ച് നായാട്ടു സംഘത്തിന്റെ ആക്രമണത്തില്‍ സെക്ഷന്‍ ഫോറസ്റ്റ് ഓഫിസര്‍ ഉള്‍പ്പെടെ നാല് പേര്‍ക്ക് പരിക്കേറ്റു.
കഴിഞ്ഞ ദിവസം രാത്രി പന്ത്രണ്ട് മണിക്ക് വനം വകുപ്പ് ഓഫീസില്‍ ലഭിച്ച സന്ദേശത്തിന്റെ അടിസ്ഥാനത്തില്‍ എത്തിയ വനം വകുപ്പ് ഉദ്യോഗസ്ഥരെ നായാട്ടു സംഘം ആക്രമിക്കുകയായിരുന്നു. കോളനിക്കടുത്ത് താമസിക്കുന്ന മരുതോളിബേബി എന്നയാള്‍ തോക്കുമായി വനത്തില്‍ നായാട്ടിനായി എത്തി എന്ന വിവരമാണ് വനം വകുപ്പിന് ലഭിച്ചത്.ഇതേ തുടര്‍ന്ന് കക്കയം സെക്ഷന്‍ ഫോറസ്റ്റ്ഓഫീസര്‍ പ്രമോദ് കുമാര്‍, ഫോറസ്റ്റര്‍ രജിത്ത് കുമാര്‍, ബീറ്റ് ഓഫീസര്‍ എന്‍.കെ ബാലകൃഷ്ണന്‍, ഡ്രൈവര്‍ രാധാകൃഷ്ണന്‍ എന്നിവരാണ് അന്വേഷിക്കാനെത്തിയത്.
വനത്തില്‍ നിന്നു വേട്ടയാടിയ മൃഗവുമായി എത്തിയ ബേബിയെ ഫോറസ്റ്റ് സംഘം പിടികൂടുകയും കുതറിയ ബേബിയും പിന്നാലെ ബൈക്കില്‍ എത്തിയമകനും മറ്റ് രണ്ട് പേരും കയ്യില്‍ കരുതിയ കത്തിയും പട്ടികയും ഉപയോഗിച്ച് വനപാലകരെ ആക്രമിക്കുകയായിരുന്നു. കത്തി വീശിയതിനെ തുടര്‍ന്ന് മുക്കിനും കൈക്കും പരിക്കേറ്റ നാലുപേരേയും പേരാമ്പ്ര താലൂക്കാശുപത്രിയിലും വിദഗ്ദ ചികിത്സക്കായി കോഴിക്കോട് മെഡിക്കല്‍ കോളജാശുപത്രിയിലും പ്രവേശിപ്പിച്ചു.
വനത്തില്‍ അതിക്രമിച്ചു കടന്ന് വേട്ടയാടിയതിനും വനപാലകരെ ആക്രമിച്ചതിനും കൂരാച്ചുണ്ട് പൊലിസ് ബേബിയും മകനും എതിരെ കേസെടുത്തു.