തിരുവനന്തപുരം: വൈദ്യുതി ബില്ലടക്കാനുള്ള കാര്യം ഓര്‍ത്തുവയ്ക്കുന്നതും സമയത്തിന് അടയ്ക്കാതെ കണക്ഷന്‍ കട്ടായിപോകുന്നതും ഇനി പഴങ്കഥ. ബില്‍ തുക ഉപയോക്താക്കളുടെ ബാങ്ക് അക്കൗണ്ടില്‍ നിന്ന് യഥാസമയം നേരിട്ടടയ്ക്കുന്നതിനുള്ള കെ.എസ്.ഇ.ബിയുടെ ഇപേയ്‌മെന്റ് പദ്ധതികള്‍ നിലവില്‍ വന്നു.
ബാങ്ക് അക്കൗണ്ടില്‍നിന്ന് നേരിട്ട് ബില്‍ തുക വരവു വയ്ക്കാന്‍ സാധിക്കുന്ന പദ്ധതി നാഷനല്‍ ഓട്ടോമേറ്റഡ് ക്ലിയറിങ് ഹൗസ് (എന്‍.എ.സി.എച്ച്) സംവിധാനം വഴിയാണ് നടപ്പാക്കുന്നത്. നാഷണല്‍ പേയ്‌മെന്റ് കോര്‍പറേഷന്‍ ഓഫ് ഇന്ത്യയാണ് ഈ സംവിധാനം ഒരുക്കുന്നത്. ഇതിനായി ഉപയോക്താക്കള്‍ ബില്‍തുക അക്കൗണ്ടില്‍ നിന്ന് ട്രാന്‍സ്ഫര്‍ ചെയ്യുന്നതിനുള്ള സമ്മതപത്രം ഒപ്പിട്ടു നല്‍കണം. തുക സമയത്തിന് അക്കൗണ്ടില്‍ നിന്ന് കെ.എസ്. ഇ.ബി ഈടാക്കിക്കൊള്ളും. ബില്ലടയ്‌ക്കേണ്ട അവസാന തിയതിയും മറ്റും ഓര്‍ത്തിരിക്കേണ്ട ആവശ്യമില്ല. കണക്ഷന്‍ വിച്ഛേദിക്കല്‍ മൂലമുള്ള അസൗകര്യങ്ങള്‍, പുനഃസ്ഥാപനത്തിനുള്ള ഫീസ് മുതലായവ ഒഴിവാക്കാനും കഴിയും. മികച്ച ഉപഭോക്തൃ സേവനം ഉറപ്പു വരുത്താന്‍ വൈദ്യുതി ബോര്‍ഡില്‍ നടപ്പാക്കുന്ന സാങ്കേതിക സംവിധാനങ്ങള്‍ ഉപയോക്താക്കള്‍ പൂര്‍ണമായും ഉപയോഗപ്പെടുത്തണമെന്ന് ഉദ്ഘാടന ചടങ്ങില്‍ വൈദ്യുതി മന്ത്രി എം.എം. മണി പറഞ്ഞു. ബില്‍ തുക അടയ്ക്കുന്നതിനു കെ.എസ്.ഇബി എന്ന പേരില്‍ ഒരു മൊബൈല്‍ ആപ്ലിക്കേഷനും മന്ത്രി ചടങ്ങില്‍ സമര്‍പ്പിച്ചു. മൊബൈല്‍ഫോണ്‍, ടാബ്‌ലെറ്റ് തുടങ്ങിയവ വഴി എവിടെ നിന്നും ഏതു സമയത്തും ഈ ആപ്പ് വഴി ബില്‍ തുക അടയ്ക്കാം. ഗൂഗിള്‍ പ്ലേസ്റ്റോറില്‍ നിന്ന് ആപ്പ് ഡൗണ്‍ലോഡ് ചെയ്യുന്നതിനും സൗകര്യമൊരുക്കിയിട്ടുണ്ടെന്നും മന്ത്രി അറിയിച്ചു.
മേയര്‍ വി.കെ. പ്രശാന്ത് അധ്യക്ഷനായ ചടങ്ങില്‍ കെ.എസ്.ഇ.ബി ചെയര്‍മാനും മാനേജിങ് ഡയറക്ടറുമായ ഡോ. കെ. ഇളങ്കോവന്‍ സ്വാഗതം പറഞ്ഞു. കൗണ്‍സിലര്‍ ഐഷാ ബേക്കര്‍, കെ.എസ്.ഇ.ബി ഡയറക്ടര്‍ (ഫിനാന്‍സ്) എന്‍.എസ്. പിള്ള, കോര്‍പ്പറേഷന്‍ ബാങ്ക് എക്‌സിക്യൂട്ടിവ് ഡയറക്ടര്‍ ഗോപാല്‍ മുരളി ഭഗത്, ഡയറക്ടര്‍മാരായ ഡോ. വി. ശിവദാസന്‍, പി. കുമാരന്‍ തുടങ്ങിയവര്‍ സംബന്ധിച്ചു.