സിഡ്‌നി: പ്ലേയോഫ് പോരാട്ടങ്ങളില്‍ വിജയം സ്വന്തമാക്കി ഡെന്‍മാര്‍കും ആസ്‌ത്രേലിയയും അടുത്ത വര്‍ഷം റഷ്യയില്‍ അരങ്ങേറുന്ന ലോകകപ്പിന് സീറ്റുറപ്പിച്ചു. ഇതോടെ ഫൈനല്‍ റൗണ്ടിലെ 32ല്‍ 31 സീറ്റുകളിലും ടീമുകള്‍ സ്ഥാനമുറപ്പിച്ചു. പെറു- ന്യൂസിലന്‍ഡ് പ്ലേയോഫ് പോരാട്ടത്തിലെ വിജയികള്‍ അവസാന സീറ്റ് സ്വന്തമാക്കും.
ഡെന്‍മാര്‍ക്- 5-1ന് അയര്‍ലന്‍ഡിനെ വീഴ്ത്തിയാണ് യോഗ്യത ഉറപ്പിച്ചത്. ആദ്യ പാദം ഗോള്‍രഹിതമായപ്പോള്‍ രണ്ടാം പാദത്തില്‍ 5-1ന്റെ മിന്നും വിജയമാണ് ഡെന്‍മാര്‍ക് സ്വന്തമാക്കിയത്. ക്രിസ്റ്റ്യന്‍ എറിക്‌സന്‍ നേടിയ ഹാട്രിക്ക് ഗോളുകളാണ് ഡെന്‍മാര്‍കിന്റെ വിജയം അനായാസമാക്കിയത്.
ആസ്‌ത്രേലിയ ഇരു പാദങ്ങളിലായ ഹോണ്ടുറാസിനെ 3-1ന് വീഴ്ത്തിയാണ് ടിക്കറ്റുറപ്പിച്ചത്. രണ്ട് പെനാല്‍റ്റി ഗോളുകള്‍ ഹോണ്ടുറാസിന്റെ വിധിയെഴുതി. ഈ രണ്ട് പെനാല്‍റ്റിയടക്കം മൂന്ന് ഗോളുകള്‍ നേടി ഹാട്രിക്കോടെ ജെഡിനകാണ് ആസ്‌ത്രേലിയന്‍ വിജയത്തില്‍ കരുത്തായി നിന്നത്.

അര്‍ജന്റീനയെ
അട്ടിമറിച്ച് നൈജീരിയ
ബ്യൂണസ് ഐറിസ്: അന്താരാഷ്ട്ര സൗഹൃദ ഫുട്‌ബോള്‍ പോരാട്ടത്തില്‍ മുന്‍ ലോക ചാംപ്യന്‍മാരായ അര്‍ജന്റീനയെ നൈജീരിയ 4-2ന് അട്ടിമറിച്ചു. രണ്ട് ഗോളിന് പിന്നില്‍ നിന്ന ശേഷമാണ് നൈജീരിയ നാല് ഗോളുകള്‍ തിരിച്ചടിച്ച് അര്‍ജന്റീനയെ ഞെട്ടിച്ചത്. നൈജീരിയക്കായി ഇവോബി ഇരട്ട ഗോളുകള്‍ നേടി. അഗ്യെറോ, ബെനേഗ എന്നിവരാണ് അര്‍ജന്റീനയ്ക്കായി വല ചലിപ്പിച്ചത്.
മറ്റ് മത്സരങ്ങളില്‍ കരുത്തരായ ബ്രസീലിനെ ഇംഗ്ലണ്ട് യുവ നിര ഗോള്‍രഹിത സമനിലയില്‍ തളച്ചു. ജര്‍മനി- ഫ്രാന്‍സ് പോരാട്ടം 2-2നും സ്‌പെയിന്‍- റഷ്യ മത്സരം 3-3നും തുല്ല്യതയില്‍ പിരിഞ്ഞു.
ലാറ്റിനമേരിക്കന്‍ കരുത്തരായ ഉറുഗ്വെയെ ഓസ്ട്രിയ 2-1ന് അട്ടിമറിച്ചു. ഹോളണ്ട് 3-0ത്തിന് റൊമാനിയയെ കീഴടക്കി. പോര്‍ച്ചുഗല്‍- യു.എസ്.എ മത്സരം 1-1ന് സമനില. ബെല്‍ജിയം 1-0ത്തിന് ജപ്പാനെ പരാജയപ്പെടുത്തി.