തൃക്കരിപ്പൂര്‍: നാളെ മുതല്‍ രണ്ടു ദിവസങ്ങളിലായി ഉദിനൂര്‍ ഗവ. ഹയര്‍സെക്കന്‍ഡറി സ്‌കൂളില്‍ നടക്കുന്ന റവന്യൂ ജില്ലാ സ്‌കൂള്‍ ശാസ്‌ത്രോത്സവത്തിന്റെ ഒരുക്കങ്ങള്‍ പൂര്‍ത്തിയായതായി സംഘാടകര്‍ വാര്‍ത്താസമ്മേളനത്തില്‍ അറിയിച്ചു. രണ്ടു ദിവസങ്ങളിലായി ഉദിനൂര്‍ ഗവ. ഹയര്‍ സെക്കന്‍ഡറി സ്‌കൂള്‍, ഉദിനൂര്‍ സെന്‍ട്രല്‍ എ.യു.പി സ്‌കൂള്‍ എന്നിവിടങ്ങളിലായാണു മേള നടക്കുക. ജില്ലയിലെ ഏഴ് ഉപജില്ലകളില്‍ നിന്നായി 3500 മത്സരാര്‍ഥികള്‍ വിവിധ വിഭാഗങ്ങളിലായി എത്തും. 37 പേര്‍ അപ്പീല്‍ വഴിയും മേളയില്‍ പങ്കെടുക്കുന്നുണ്ട്. ഗണിത ശാസ്ത്ര മേളയിലാണ് കൂടുതല്‍ പേര്‍ അപ്പീല്‍ വഴിയെത്തുന്നത്. ഐ.ടി മേളയില്‍ ഒരാള്‍ മാത്രമാണ് അപ്പീല്‍ മുഖാന്തിരം വരുന്നത്. ശാസ്ത്രം, ഗണിത ശാസ്ത്രം, സാമൂഹ്യ ശാസ്ത്രം, ഐ.ടി, പ്രവൃത്തിപരിചയം എന്നീ അഞ്ചു വിഭാഗങ്ങളിലായി തത്സമയ, പ്രദര്‍ശന മത്സരങ്ങളാണ് നടക്കുക. എല്‍.പി, യു.പി ഹൈസ്‌കൂള്‍, ഹയര്‍ സെക്കന്‍ഡറി എന്നിങ്ങനെ നാലു വിഭാഗത്തിലാണു മത്സരം. ശാസ്ത്ര, സാമൂഹ്യശാസ്ത്രമേളകളിലെ ക്വിസ്, പ്രാദേശിക ചരിത്രരചന, ശാസ്ത്ര നാടകം എന്നീ ഇനങ്ങള്‍ പൂര്‍ത്തിയായി. ശാസ്ത്ര വിഭാഗങ്ങളില്‍ അധ്യാപകര്‍ക്കും മത്സരമുണ്ട്. ജില്ലാതല മത്സരത്തിലെ ആദ്യ രണ്ടു സ്ഥാനക്കാരാണ് കോഴിക്കോട് നടക്കുന്ന സംസ്ഥാന ശാസ്‌ത്രോത്സവത്തില്‍ പങ്കെടുക്കാന്‍ അര്‍ഹത നേടുക. നാളെ ഹൈസ്‌കൂളില്‍ പ്രവൃത്തി പരിചയ മേളയിലെ തത്സമയ മത്സരങ്ങളും ഉദിനൂര്‍ സെന്‍ട്രല്‍ എ.യുപി സ്‌കൂളില്‍ ഗണിത ശാസ്ത്ര മേളയുമാണു നടക്കുക. 18നു ഹൈസ്‌കൂളില്‍ ശാസ്ത്ര, ഐ.ടി മേളകളും യുപി സ്‌കൂളില്‍ സാമൂഹ്യ ശാസ്ത്ര മേളയും നടക്കും. പ്രവൃത്തി പരിചയ മേളയിലെ പ്രദര്‍ശന മത്സരവും ഹൈസ്‌കൂളില്‍ 18നു നടക്കും. തത്സമയ മത്സരങ്ങളില്‍ കുട്ടികള്‍ നിര്‍മിച്ച ഉല്‍പന്നങ്ങളാണ് പ്രദര്‍ശിപ്പിക്കുക. ഉപജില്ലാ തലത്തിലാണ് പ്രദര്‍ശന സ്റ്റാള്‍ ഒരുക്കുക. പ്രവൃത്തി പരിചയ വിഭാഗത്തിലെ 120 തത്സമയ മത്സരങ്ങള്‍ നടത്താന്‍ സ്ഥല പരിമിതി കാരണം സ്‌കൂള്‍ കളിസ്ഥലത്ത് കൂറ്റന്‍ പന്തല്‍ നിര്‍മിച്ചാണ് സൗകര്യം ഒരുക്കുന്നത്. രണ്ടു ദിവസങ്ങളിലായി മേളയിലെത്തുന്ന മത്സരാര്‍ഥികള്‍, വിധികര്‍ത്താക്കള്‍, സംഘാടകര്‍ തുടങ്ങി ഏഴായിരം പേര്‍ക്ക് ഭക്ഷണം ഒരുക്കും. പ്രഭാത ഭക്ഷണവും നല്‍കും. ഉച്ചയ്ക്ക് പായസം ഉള്‍പ്പെടെയുള്ള വിഭവ സമൃദ്ധമായ സദ്യയാണ് വിളമ്പുക. രണ്ടാം ദിവസം മേള നടക്കുന്ന രണ്ടു വിദ്യാലയങ്ങളിലെയും മുഴുവന്‍ കുട്ടികള്‍ക്കും സദ്യ നല്‍കും. ഐ.ടി മേളയുടെ ഭാഗമായി ജില്ലാ ഐ.ടി അറ്റ് സ്‌കൂള്‍ സൗജന്യ സ്വതന്ത്ര സോഫ്റ്റ്‌വെയര്‍ ഇന്‍സ്റ്റലേഷന്‍ ഫെസ്റ്റ് സംഘടിപ്പിക്കും. സ്വതന്ത്ര സോഫ്റ്റ്‌വെയര്‍ ആവശ്യമായവര്‍ക്ക് ലാപ്‌ടോപ്പുകളില്‍ സൗജന്യമായി അവ ഇന്‍സ്റ്റാള്‍ ചെയ്തു നല്‍കും.
ശാസ്‌ത്രോത്സവം 17നു രാവിലെ 10നു എം. രാജഗോപാലന്‍ എ.എല്‍.എ ഉദ്ഘാടനം ചെയ്യും. പടന്ന ഗ്രാമ പഞ്ചായത്ത് പ്രസിഡന്റ് പി.സി ഫൗസിയ അധ്യക്ഷയാകും. 18നു വൈകിട്ട് നാലിനു നടക്കുന്ന സമാപന സമ്മേളനം ജില്ലാ പഞ്ചായത്ത് പ്രസിഡന്റ് എ.ജി.സി ബഷീര്‍ ഉദ്ഘാടനം ചെയ്യും. നീലേശ്വരം ബ്ലോക്ക് പഞ്ചായത്ത് പ്രസിഡന്റ് വി.പി. ജാനകി അധ്യക്ഷയാകും. വാര്‍ത്താസമ്മേളനത്തില്‍ ജില്ലാ വിദ്യാഭ്യാസ ഉപഡയരക്ടര്‍ ഡോ. ഗിരീഷ് ചോലയില്‍, പ്രിന്‍സിപ്പാള്‍ സി.പി ജയശ്രീ, പ്രധാനധ്യാപകന്‍ സി.കെ രവീന്ദ്രന്‍, പ്രോഗ്രാം കണ്‍വീനര്‍ വി.വി സുരേഷ്, പ്രമോദ് അടുത്തില എന്നിവര്‍ സംബന്ധിച്ചു.