അഹമ്മദാബാദ്: ബി.ജെ.പിയെ ഞെട്ടിച്ചുകൊണ്ട് പട്ടീദാര്‍ അനാമത് ആന്ദോളന്‍ സമിതി നേതാവ് ഹാര്‍ദിക് പട്ടേലിന്റെ മുന്നറിയിപ്പ്. ചില ബി.ജെ.പി നേതാക്കള്‍ക്കെതിരായി ദിവസങ്ങള്‍ക്കുള്ളില്‍ ചില വെളിപ്പെടുത്തലുകള്‍ നടത്തുമെന്നാണ് അദ്ദേഹം ഇന്നലെ അഹമ്മദാബാദില്‍ പ്രഖ്യാപിച്ചത്.
അശ്ലീല വിഡിയോ പുറത്തിറക്കി ഹാര്‍ദിക് പട്ടേലിനെ സമ്മര്‍ദത്തിലാക്കിയ ബി.ജെ.പി നീക്കത്തിന് തിരിച്ചടിയായാണ് ചില വെളിപ്പെടുത്തലുകള്‍ നടത്തുമെന്ന് അദ്ദേഹം അറിയിച്ചത്. നാളെ ഗാന്ധി നഗറില്‍ നടക്കുന്ന തന്റെ റാലിയില്‍ വെളിപ്പെടുത്തലുകള്‍ നടത്തുമെന്നാണ് ഹാര്‍ദിക് അറിയിച്ചത്. തന്റെ നിലപാടില്‍ ഇപ്പോഴും ഉറച്ചു നില്‍ക്കുകയാണ്. ഏത് രീതിയിലുള്ള സമ്മര്‍ദമുണ്ടായാലും തന്റെ വഴിയില്‍ നിന്ന് ഒരിക്കല്‍പോലും വ്യതിചലിക്കില്ലെന്ന് അദ്ദേഹം വ്യക്തമാക്കി. അമിത്ഷായുടെ ജന്മസ്ഥലമായ മന്‍സയില്‍ നടക്കുന്ന റാലിയില്‍ ബി.ജെ.പിയെ ഞെട്ടിച്ചുകൊണ്ട് അവരുടെ ചില നേതാക്കള്‍ക്കെതിരേയുള്ള ഒരു ബോംബായിരിക്കും താന്‍ പൊട്ടിക്കുകയെന്ന് ഹാര്‍ദിക് അറിയിച്ചു.