പാനൂര്‍: സംഘര്‍ഷം തുടരുന്ന പാനൂരിനടുത്ത എലാങ്കോട് നിന്നും ബോംബുകളും വടിവാളും കണ്ടെത്തി. ഇന്ന് രാവിലെ എട്ടോടെ പാനൂര്‍ സി.ഐ എം കെ സജീവ്, പ്രിന്‍സിപ്പല്‍ എസ് ഐ ഷൈജിത്ത് ന്യൂ മാഹി പ്രിന്‍സിപ്പല്‍ എസ് ഐ അന്‍ഷാദ്, ധര്‍മ്മടം പ്രിന്‍സിപ്പല്‍ എസ് ഐ അരുണ്‍, എസ് ഐ സന്തോഷ്, സിവില്‍ പൊലിസ് ഓഫിസര്‍മാരായ പ്രദീപ്, ഷാജി, ഷാജില്‍, രജിത്ത്, സംജിത്ത് എന്നിവരുടെ നേതൃത്വത്തിലായിരുന്നു റെയ്ഡ്.

റെയ്ഡില്‍ എലാങ്കോട് സ്വാമി മഠം പാറയ്ക്ക് താഴെ ആളൊഴിഞ്ഞ പറമ്പില്‍ പ്ലാസ്റ്റിക്ക് സഞ്ചിയില്‍ സൂക്ഷിച്ച നിലയിലാണ് ഏഴു നാടന്‍ ബോംബുകളും രണ്ടു വടിവാളും കണ്ടെത്തിയത്. ഈ മേഖലയില്‍ കൂടുതല്‍ ആയുധങ്ങള്‍ക്കായും പ്രതികള്‍ക്കായും റെയ്ഡ് തുടരുകയാണ്.

ഇന്നലെ പുത്തൂര്‍ മടപ്പുരയ്ക്ക് സമീപം സി പി എം പ്രവര്‍ത്തകനായ തച്ചാറമ്പത്ത് അഷ്‌റഫി (55)ന് ആര്‍ എസ് എസുകാരുടെ വെട്ടേറ്റിരുന്നു. ഗുരുതരമായി പരുക്കേറ്റ അഷ്‌റഫ് തലശേരി സഹകരണാശുപത്രിയില്‍ ചികിത്സയിലാണ്. നാല് ദിവസമായി ഈ മേഖലയില്‍ സംഘര്‍ഷം നടന്നു വരികയാണ്. ഇതിനിടെ ആര്‍ എസ്എസ് അക്രമത്തിനെതിരേ സി പി എമ്മിന്റെ ആഭിമുഖ്യത്തില്‍ ഇന്ന് വൈകുന്നേരം നാലിന് പ്രതിഷേധ കൂട്ടായ്മ സംഘടിപ്പിച്ചിട്ടുണ്ട്. കൂട്ടായ്മ സി പി എം ജില്ലാ സിക്രട്ടറി പി ജയരാജന്‍ ഉദ്ഘാടനം ചെയ്യും.