തൊടുപുഴ: അക്ഷയ പദ്ധതിയുടെ 15-ാം വാര്‍ഷികത്തോടനുബന്ധിച്ച് നവജാത ശിശുക്കള്‍ക്ക് ജനനദിവസം തന്നെ ആധാര്‍ എന്റോള്‍മെന്റ് നടത്തുന്ന പദ്ധതിക്ക് ഇടുക്കി ജില്ലയില്‍ തുടക്കമായി. പഞ്ചായത്തില്‍ നിന്നും ജനനസര്‍ട്ടിഫിക്കറ്റ് ലഭിക്കുന്ന കുട്ടികള്‍ക്ക് ജനനദിവസം തന്നെ ആധാര്‍ എന്റോള്‍മെന്റ് ലഭ്യമാക്കുന്ന പദ്ധതിയാണിത്. ഇന്നലെ ഇടുക്കി ജില്ലാ ആശുപത്രിയില്‍ നിരഞ്ജന്‍, അനാമിക എന്നീ നവജാത ശിശുക്കളുടെ ആധാര്‍ എന്റോള്‍മെന്റ് നടത്തിക്കൊണ്ട് ജില്ലാ കലക്ടര്‍ ജി.ആര്‍. ഗോകുല്‍ പദ്ധതി ഉദ്ഘാടനം ചെയ്തു.
അക്ഷയകേന്ദ്രത്തിന്റെ നേതൃത്വത്തിലാണ് പദ്ധതി നടപ്പാക്കുന്നത്. ആധാര്‍ എന്റോള്‍മെന്റിന് നേതൃത്വം നല്‍കുന്നതിന് ജില്ലാ മെഡിക്കല്‍ ഓഫീസര്‍ ഡോ.പി.കെ. സുഷമ, ജില്ലാ ആശുപത്രി സൂപ്രണ്ട് ഡോ.എം.മണികണ്ഠന്‍, വാഴത്തോപ്പ് ഗ്രാമപഞ്ചായത്ത് സെക്രട്ടറി മധുസൂദനന്‍ ഉണ്ണിത്താന്‍, ജില്ലാ ഇ-ഗവേണന്‍സ് സൊസൈറ്റി പ്രോജക്ട് മാനേജര്‍ എസ്. നിവേദ്, അക്ഷയ കോ-ഓര്‍ഡിനേറ്റര്‍ സുബി ജി പ്ലാന്തോട്ടം, അക്ഷയ ബ്ലോക്ക് കോ-ഓര്‍ഡിനേറ്റര്‍ സാം അഗസ്റ്റിന്‍, സംരംഭകരായ ആദര്‍ശ് കുര്യന്‍, ബിജു മാത്യു എന്നിവര്‍ നേതൃത്വം നല്‍കി.
തൊടുപുഴ താലൂക്ക് ആശുപത്രിയില്‍ മോന്‍സണ്‍ മാത്യു, സന്തോഷ് ഗോപാല്‍ എന്നിവരും നെടുങ്കണ്ടം താലൂക്ക് ആശുപത്രിയില്‍ നടന്ന പരിപാടിയില്‍ സംരംഭകരായ ലിജോ ജോസഫ്, പ്രിന്‍സ് ജോര്‍ജ്ജ് എന്നിവരും നേതൃത്വം നല്‍കി. തൊടുപുഴ താലൂക്ക് ആശുപത്രിയില്‍ ആര്‍.എം.ഒ ഡോ.അജി പിന്‍ ആധാര്‍ എന്റോള്‍മെന്റ് ഉദ്ഘാടനം ചെയ്തു. അക്ഷയസംരംഭകരായ സന്തോഷ്, മോണ്‍സണ്‍, അജിത്, അനില്‍, സോമരാജ് എന്നിവര്‍ പങ്കെടുത്തു. നെടുങ്കണ്ടം താലൂക്ക് ആശുപത്രിയില്‍ നെടുങ്കണ്ടം ഗ്രാമപഞ്ചായത്ത് പ്രസിഡന്റ് എസ്. ജ്ഞാനസുന്ദരം പദ്ധതി ഉദ്ഘാടനം ചെയ്തു.
ഗ്രാമപഞ്ചായത്തംഗം ഷിഹാബുദ്ദീന്‍ യൂസഫ്, താലൂക്ക് ആശുപത്രി സൂപ്രണ്ട് ഡോ. മെറിന്‍, അക്ഷയ ബ്ലോക്ക് കോ-ഓര്‍ഡിനേറ്റര്‍ ലിസി സോമന്‍, അക്ഷയ സംരംഭകരായ പ്രിന്‍സ്, ലിജോ ജോസഫ് എന്നിവര്‍ നേതൃത്വം നല്‍കി.