ദോഹ: ഫാന്‍സി വാഹന നമ്പര്‍ പ്ലേറ്റുകളുടെ ആറാമത് ഓണ്‍ലൈന്‍ ലേലത്തിലൂടെ ലഭിച്ചത് 97.6 ലക്ഷം റിയാല്‍. ഗതാഗത വകുപ്പാണ് ഓണ്‍ലൈന്‍ ലേലം നടത്തിയത്. 22 ഫാന്‍സി നമ്പറുകളാണ് രണ്ട് ദിവസം നീണ്ട ഇത്തവണത്തെ ഓണ്‍ലൈന്‍ ലേലത്തില്‍വെച്ചത്. 344444 എന്ന നമ്പര്‍ പ്ലേറ്റിനാണ് ഏറ്റവും കൂടുതല്‍ തുക ലഭിച്ചത്, 12.5ലക്ഷം റിയാലാണ് ഈ നമ്പറിന് ലഭിച്ചത്. 3333444 നമ്പര്‍ പ്ലേറ്റിന് 938,000 റിയാലാണ് ലഭിച്ചത്. 441111 എന്ന നമ്പറിന് 770,000 റിയാലും 444400 നമ്പറിന് 6,30,000 റിയാലും ലഭിച്ചു. മറ്റ് നമ്പറുകള്‍ക്ക് 1,50,000 റിയാലിനും 5,50,000 റിയാലിനും ഇടയില്‍ ലഭിച്ചു. ഇത്തവണ കടുത്ത മത്സരമാണ് നടന്നത്. ഒരു ലക്ഷം ഖത്തര്‍ റിയാലായിരുന്നു ലേലത്തിലെ പ്രാരംഭതുക.