വിജയവാഡ: ദേശീയ ജൂനിയര്‍ അത്‌ലറ്റിക്‌സ് ചാംപ്യന്‍ഷിപ്പില്‍ കേരളത്തെ പന്തള്ളി ഹരിയാന കിരീടം സ്വന്തമാക്കി. 27 സ്വര്‍ണം 16 വെള്ളി 16 വെങ്കലം മെഡലുകള്‍ നേടിയാണ് ഹരിയാനയുടെ മുന്നേറ്റം. 24 സ്വര്‍ണം 17 വെള്ളി 18 വെങ്കലം നേടി കേരളം രണ്ടാം സ്ഥാനത്ത്. അവസാന ദിനത്തില്‍ കേരളം അഞ്ച് സ്വര്‍ണം കൂടി നേടി.
അണ്ടര്‍ 18 പെണ്‍ വിഭാഗം 200 മീറ്ററില്‍ ആന്‍സി സോജന്‍ (24.75 സെക്കന്‍ഡ്), അണ്ടര്‍ 18 ആണ്‍ വിഭാഗം 800 മീറ്ററില്‍ അഭിഷേക് മാത്യു (1.52.84 സെക്കന്‍ഡ്), അണ്ടര്‍ 20 പെണ്‍ വിഭാഗം 800 മീറ്ററില്‍ അബിത മേരി മാനുവല്‍ (2.08.90 സെക്കന്‍ഡ്), അണ്ടര്‍ 20 ആണ്‍ വിഭാഗം 3000 മീറ്റര്‍ സ്റ്റീപിള്‍ചേസില്‍ ബിബിന്‍ ജോര്‍ജ് (9.28.22 സെക്കന്‍ഡ്), അണ്ടര്‍ 20 പെണ്‍ 4-400 മീറ്റര്‍ റിലേ ടീം(3.51.00 സെക്കന്‍ഡ്) എന്നിവരാണ് അവസാന ദിനത്തില്‍ കേരളത്തിനായി സ്വര്‍ണം നേടിയത്.
ലിനെറ്റ് ജോര്‍ജ്, അബിഗേല്‍ ആരോക്യനാഥന്‍, അന്‍സ ബാബു, അബിത മേരി മാനുവല്‍ എന്നിവരാണ് റിലേയില്‍ കേരളത്തെ സുവര്‍ണ നേട്ടത്തിലേക്ക് നയിച്ചത്. അണ്ടര്‍ 20 ആണ്‍ വിഭാഗം ഇതേയിനത്തില്‍ കേരളം വെങ്കലം കൊണ്ട് തൃപ്തിപ്പെട്ടു.
അണ്ടര്‍ 18 പെണ്‍ വിഭാഗം 2000 മീറ്റര്‍ സ്റ്റീപിള്‍ചേസില്‍ ഗായത്രി ജി, അണ്ടര്‍ 20 ആണ്‍ വിഭാഗം 800 മീറ്ററില്‍ അബിന്‍ സാജന്‍, അണ്ടര്‍ 16 പെണ്‍ വിഭാഗം 800 മീറ്ററില്‍ സാന്ദ്ര എ.എസ്, അണ്ടര്‍ 20 ആണ്‍ ട്രിപ്പിള്‍ ജംപില്‍ അനസ് എന്‍ എന്നിവര്‍ കേരളത്തിനായി അവസാന ദിനത്തില്‍ വെള്ളി മെഡല്‍ നേടി. ട്രിപ്പിളില്‍ വെങ്കലവും കേരളത്തിന് തന്നെ. ബോബി സാബുവാണ് മൂന്നാം സ്ഥാനത്തെത്തിയത്.