തിരുവനന്തപുരം: എഴുപതാം സ്വാതന്ത്ര്യ ദിനാഘോഷങ്ങളുടെ ഭാഗമായി തിരുവനന്തപുരം ഹോളി ഏഞ്ചല്‍ കോണ്‍വെന്റ്  ഹയര്‍ സെക്കന്ററി സ്‌കൂള്‍ 'നേതാജി മുതല്‍ കെ.ഇ.മാമ്മന്‍ വരെ' എന്ന പേരില്‍ ദേശ സ്‌നേഹ യാത്ര നടത്തുന്നു.
ഇന്ന്  രാവിലെ   11 .30 നു വിദ്യാര്‍ഥി സംഘം അധ്യാപകരുടെ നേതൃത്വത്തില്‍ പി.എം.ജി ജങ്ഷനിലെ നേതാജി സുഭാഷ് ചന്ദ്ര ബോസ് പ്രതിമയില്‍ പുഷ്പാര്‍ച്ചനയും ദേശ ഭക്തി ഗാനാര്‍ച്ചനയും നടത്തിക്കൊണ്ടാണ് ദേശ സ്‌നേഹ യാത്രക്ക് തുടക്കം കുറിക്കുന്നത്. തുടര്‍ന്ന് മ്യൂസിയം ജങ്ഷനിലെ സി.കേശവന്‍, വെള്ളയമ്പലം ജങഷനിലെ അയ്യങ്കാളി ,കാവടിയാറിലെ അക്കാമ്മ ചെറിയാന്‍, വഴുതക്കാട് ജങ്ഷനിലെ ആനി മസ്‌ക്രീന്‍, പനവിളയിലെ ലാല്‍ ബഹാദൂര്‍ ശാസ്ത്രി തുടങ്ങിയവരുടെ പ്രതിമകളില്‍ പുഷ്പാര്‍ച്ചന നടത്തുന്ന സംഘം ഉച്ചക്ക് ഒരു മണിക്ക്  ഗാന്ധി പാര്‍ക്കിലെ ഗാന്ധി പ്രതിമയില്‍ പുഷ്പാര്‍ച്ചനയും ഗാന്ധി ഗാനാഞ്ജലിയും നടത്തും.
തുടര്‍ന്ന് രണ്ടു മണിയോടെ നെയ്യാറ്റിന്‍കര നിംസ് ആശുപത്രിയില്‍ കഴിയുന്ന സ്വാതന്ത്ര്യ  ,സേനാനി കെ.ഇ.മാമ്മന്റെ അടുക്കല്‍ എത്തുന്ന കുട്ടികള്‍ അദ്ദേഹത്തെ ആദരിക്കും. .കെ.ഇ.മാമ്മന്‍ സ്വാതന്ത്ര്യ ദിന സന്ദേശം നല്‍കും.സ്‌കൂള്‍ പ്രിന്‍സിപ്പാള്‍ സിസ്റ്റര്‍.മോളി ആട്ടൂളി,അധ്യാപിക എസ്.ശ്രീലത ,ഗാന്ധിയന്‍ നേതാവ് ജെ.എം.റഹിം എന്നിവര്‍ പരിപാടികള്‍ക്ക് നേതൃത്വം നല്‍കും.
രാവിലെ 8.30നു സ്‌കൂളില്‍ സ്വാതന്ത്ര്യ ദിന പരിപാടികള്‍ നടക്കും .ദേശീയ പതാക സ്വാതന്ത്ര്യ സമര സേനാനിയും മുതിര്‍ന്ന ഗാന്ധിയനായ അഡ്വ.കെ.അയ്യപ്പന്‍ പിള്ള ഉയര്‍ത്തും.ഡോ.എന്‍.രാധാകൃഷ്ണന്‍ മുഖ്യ പ്രഭാഷണം നടത്തും.