കൊച്ചി: കൊല്ലം സ്വദേശി വിജയകുമാറിനിത് നിശ്ചയാദാര്‍ഢ്യത്തിന്റെ വിജയം. അഞ്ചുമാസം മാത്രം പ്രായമുള്ള പിഞ്ചുകുഞ്ഞിന്റെ ജീവനുമായി തിരുവനന്തപുരത്തുനിന്ന് കൊച്ചിയിലേക്ക് ആംബുലന്‍സില്‍ പായുമ്പോള്‍ ഡ്രൈവര്‍ വിജയകുമാറിന്റെ മനസില്‍ തെളിഞ്ഞുനിന്നത് ചികിത്സകിട്ടാതെ മരിച്ച മുരുകന്റെ മുഖമായിരുന്നു.
കഴിഞ്ഞ ഓഗസ്റ്റില്‍ ഇതുപോലെ മുരുകനുമായിവിജയകുമാര്‍ തന്റെ ആംബുലന്‍സില്‍ തിരുവനന്തപുരം മെഡിക്കല്‍കോളജ് ഉള്‍പ്പെടെ നിരവധി ആശുപത്രികളില്‍ എത്തിയത്. എന്നാല്‍ അധികൃതരുടെ കരുണയില്ലാത്ത പെരുമാറ്റത്തെ തുടര്‍ന്ന് തക്കസമയത്ത് ചികിത്സ ലഭിക്കാത മുരുകന്‍ മരിച്ചു.
അന്ന് ഒരു ജീവന്‍രക്ഷിക്കുന്നതിനായി താന്‍ മുട്ടാത്ത വാതിലുകളില്ലെന്ന് വിജയകുമാര്‍ വേദനയോടെ ഓര്‍ക്കുന്നു. എന്നാല്‍ ഇന്നലെ മരണവുമായി മല്ലിടുന്ന പിഞ്ചുകുഞ്ഞിനെ സമയത്തെപോലും തോല്‍പ്പിച്ച് തിരുവനന്തപുരത്തുനിന്ന് കൊച്ചിയിലെത്തിച്ചപ്പോള്‍ ആ മുഖത്ത് കണ്ടത് ആശ്വാസത്തിന്റെ പുഞ്ചിരിയായിരുന്നു. എമര്‍ജന്‍സി മെഡിക്കല്‍ ടെക്‌നീഷ്യന്‍ മിഥുനും യാത്രയില്‍ ഒപ്പംചേര്‍ന്നു.
ഗുരുതര ഹൃദ്രോഗം ബാധിച്ച അഞ്ചു മാസം പ്രായമുള്ള കുഞ്ഞിനെ അടിയന്തര ശസ്ത്രക്രിയയ്ക്കായാണ് തിരുവനന്തപുരം എസ്.എ.ടി ആശുപത്രിയില്‍ നിന്ന് എറണാകുളം ലിസി ആശുപത്രിയിലെത്തിച്ചത്. 208 കിലോമീറ്റര്‍ ദുരം വിജയകുമാര്‍ താണ്ടിയത് 2.55 മണിക്കൂര്‍ കൊണ്ടായിരുന്നു. കുഞ്ഞിനെയും വഹിച്ചുള്ള ആംബുലന്‍സിന് യാത്ര സുഗമമാക്കാന്‍ പൊലിസിനൊപ്പം അറുപതോളം ആംബുലന്‍സുകളും തിരുവനന്തപുരം-എറണാകുളം പാതയില്‍ വിവിധ ഘട്ടങ്ങളില്‍ അകമ്പടി സേവിച്ചു.
തമിഴ്‌നാട് ശിവഗംഗ സ്വദേശികളായ തങ്കരാജിന്റെയും ശിവകാമിയുടെയും ആണ്‍കുഞ്ഞിനെയാണ് തിരുവനന്തപുരം അവിട്ടം തിരുനാള്‍ ആശുപത്രിയില്‍ നിന്ന് ലിസി ആശുപത്രിയിലെത്തിച്ചത്.
ഹൃദയത്തിലെ പ്രധാന അറകള്‍ തമ്മില്‍ ബന്ധിപ്പിക്കുന്ന ഭിത്തിയില്‍ ദ്വാരവും വാല്‍വിനു ചോര്‍ച്ചയും സംഭവിക്കുന്ന രോഗമാണു കുഞ്ഞിനുള്ളത്. ഇന്നലെ ഉച്ചയ്ക്ക് 12.30ന് കുഞ്ഞുമായി യാത്ര തിരിച്ച ആംബുലന്‍സ് 3.25നു ലിസിയിലെത്തി.