ജിദ്ദ: വിദേശികള്‍ക്ക് ഡ്രൈവിംഗ് ലൈസന്‍സ് അനുവദിക്കുന്നതിന് പുതിയ നിയന്ത്രണങ്ങള്‍ ഏര്‍പ്പെടുത്താനുള്ള നീക്കങ്ങളുമായി സഊദി മന്ത്രാലയം.

ട്രാഫിക് വിഭാഗമാണ് ഇതു സംബന്ധിച്ച വിശദാംശങ്ങള്‍ വ്യക്തമാക്കിയത്.ഡ്രൈവര്‍ വിസയിലല്ലാതെ മറ്റു തൊഴിലുകള്‍ക്ക് രാജ്യത്തെത്തുന്നവര്‍ക്ക് ഡ്രൈവിംഗ് ലൈസന്‍സ് അനുവദിക്കുന്നത് നിയന്ത്രിക്കുന്നതിനെ സംബന്ധിച്ച് തൊഴില്‍ മന്ത്രാലയവുമായി ആലോചിക്കുകയാണെന്നു ട്രാഫിക് വകുപ്പ് മേധാവി ബ്രിഗേഡിയര്‍ ജനറല്‍ മുഹമ്മദ് ബിന്‍ അബ്ദുല്ലാഹ് അല്‍ബസ്സാമി അറിയിച്ചു.

റോഡുകളിലെ വാഹനങ്ങളുടെ എണ്ണം നിയന്ത്രിക്കുന്നതിന്റെ ഭാഗമായാണ് നടപടി. നിലവില്‍ വിദേശികള്‍ക്ക് ഡ്രൈവിംഗ് ലൈസന്‍സ് അനുവദിക്കുന്നതിന് നിയന്ത്രണങ്ങളില്ല. ഒരു കോടി 10 ലക്ഷം വിദേശികള്‍ സൗദിയില്‍ ജോലി ചെയ്യുന്നുണ്ടെന്നാണ് കണക്കാക്കുന്നത്. വിദേശികള്‍ക്ക് ലൈസന്‍സ് നിയന്ത്രിക്കുന്നതിലൂടെ നിരത്തുകളില്‍ വാഹനങ്ങളുടെ എണ്ണം കുറക്കാന്‍ കഴിയുമെന്നാണ് പ്രതീക്ഷ. ഇതു സംബന്ധിച്ച കൂടിയാലോചനകള്‍ മന്ത്രാലയവുമായി നടന്നു വരുകയാണ്.

ഇത്തരത്തിലുള്ള നിബന്ധനകളൊന്നും കൂടാതെ വിദേശികള്‍ക്ക് ലൈസന്‍സ് അനുവദിക്കുന്നത് കൂടുതല്‍ അപകടങ്ങള്‍ക്കും ഗതാഗതക്കുരുക്കിനും കരണമാകുന്നുണ്ടെന്നാണ് ട്രാഫിക് വകുപ്പിന്റെ കണ്ടെത്തല്‍. ജോലി, വരുമാനം, വേതന നിലവാരം എന്നീ ഘടകങ്ങള്‍ പരിഗണിക്കാതെ ലൈസന്‍സ് നല്‍കുന്ന നയം മൂലമാണ് റോഡില്‍ വാഹങ്ങള്‍ പെരുകുന്നത്. അതിനാല്‍ കുവൈത്ത് പോലുള്ള അയല്‍ രാജ്യങ്ങള്‍ ഇതിനെതിരെ കര്‍ശന നിര്‍ദേശങ്ങള്‍ പുറപ്പെടുവിച്ചിട്ടുണ്ട്.

ശമ്പളത്തിന്റെ അടിസ്ഥാനത്തിലാണ് കുവൈറ്റില്‍ വിദേശികള്‍ക്ക് ഡ്രൈവിംഗ് ലൈസന്‍സ് അനുവദിക്കുന്നതെന്ന് പ്രാദേശിക അറബ് മാധ്യമങ്ങളുടെ റിപ്പോര്‍ട്ടില്‍ പറയുന്നു. സമാനമായ നിയന്ത്രണങ്ങള്‍ സഊദിയിലും ഏര്‍പ്പെടുത്തണമെന്നാണ് ആവശ്യം.

നിലവില്‍ ജി.സി.സി രാജ്യങ്ങളില്‍ ഏറ്റവും കൂടുതല്‍ വാഹനാപകട നിരക്കുളള രാജ്യം സഊദി അറേബ്യയാണ്. ലൈസന്‍സ് നിയന്ത്രിക്കുന്നതിലൂടെ അപകട നിരക്കു കുറക്കാനും ഗതാഗതം സുഗമമാക്കാനും കഴിയുമെന്നാണ് ട്രാഫിക് ഡയരക്ടറേറ്റിന്റെ കണക്കുകൂട്ടല്‍.