ലണ്ടന്‍: റഷ്യന്‍ നിര്‍മിത ആന്റി വൈറസ് ഉപയോഗിക്കുന്നതുമായി ബന്ധപ്പെട്ട് സര്‍ക്കാര്‍ ഓഫിസുകള്‍ക്ക് ബ്രിട്ടന്റെ ജാഗ്രതാ നിര്‍ദേശം. റഷ്യന്‍ നിര്‍മിത ആന്റി വൈറസ് സോഫ്റ്റ്‌വെയറായ കാസ്‌പെര്‍സ്‌കി ലാബിനെതിരേയാണു ജാഗ്രതാ നിര്‍ദേശം നല്‍കിയിരിക്കുന്നത്. സോഫ്റ്റ്‌വെയര്‍ രാജ്യസുരക്ഷയ്ക്കു ഭീഷണിയാണെന്നുകാണിച്ച് ബ്രിട്ടന്റെ ദേശീയ സൈബര്‍ സുരക്ഷാ കേന്ദ്രം മുഴുവന്‍ സര്‍ക്കാര്‍ വകുപ്പുകള്‍ക്കും നിര്‍ദേശം അയച്ചിട്ടുണ്ട്.
അമേരിക്കയില്‍ പ്രസിഡന്റ് തെരഞ്ഞെടുപ്പില്‍ നടന്ന ചാരപ്രവര്‍ത്തനത്തിന് ഉപയോഗിച്ചത് കാസ്‌പെര്‍സ്‌കിയാണെന്ന് നേരത്തേ ആരോപണമുയര്‍ന്നിരുന്നു. ഇതിന്റെ പശ്ചാത്തലത്തിലാണ് ബ്രിട്ടീഷ് അധികൃതരുടെ നടപടി. അതേസമയം, സോഫ്റ്റ്‌വെയര്‍ ഉപയോഗിക്കരുതെന്ന് അധികൃതര്‍ ഉത്തരവിട്ടിട്ടില്ല. എന്നാല്‍, ആരോപണം സോഫ്റ്റ്‌വെയര്‍ അധികൃതര്‍ തള്ളിക്കളഞ്ഞിട്ടുണ്ട്. ലോകത്തെ പ്രധാന ബിസിനസ് സ്ഥാപനങ്ങളിലും ഐ.ടി മേഖലയിലും മറ്റുമുള്ള കംപ്യൂട്ടറുകളില്‍ വ്യാപകമായി ഉപയോഗിക്കുന്ന ആന്റി വൈറസ് സോഫ്റ്റ്‌വെയറാണ് കാസ്‌പെര്‍സ്‌കി ലാബ്. ലോകത്ത് 400 മില്യന്‍ ജനങ്ങള്‍ ഇത് ഉപയോഗിക്കുന്നതായാണു കണക്ക്.