ഭുവനേശ്വര്‍: ത്രില്ലര്‍ പോരാട്ടത്തില്‍ കരുത്തരായ ബെല്‍ജിയത്തെ കീഴടക്കി ഇന്ത്യ ഹോക്കി വേള്‍ഡ് ലീഗിന്റെ സെമിയിലേക്ക് മുന്നേറി. നിശ്ചിത സമയത്ത് മത്സരം 3-3ന് സമനില പാലിച്ചപ്പോള്‍ ഷൂട്ടൗട്ടില്‍ 3-2ന് ഇന്ത്യ വിജയം പിടിക്കുകയായിരുന്നു. സഡന്‍ ഡെത്തിലാണ് ഇന്ത്യന്‍ വിജയം. ഇത് രണ്ടാം തവണയാണ് വേള്‍ഡ് ലീഗ് ഫൈനലിലേക്ക് ഇന്ത്യ കടക്കുന്നത്. നിശ്ചിത സമയത്തെന്ന പോലെ ഷൂട്ടൗട്ടിലും മത്സരം 2-2 എന്ന നില വന്നു. എന്നാല്‍ സഡന്‍ ഡെത്തില്‍ ഹര്‍മന്‍പ്രീത് സിങ് ലക്ഷ്യം കണ്ടപ്പോള്‍ ബെല്‍ജിയം താരത്തിന്റെ ഷോട്ട് തടുത്തിട്ട് ഗോള്‍ കീപ്പര്‍ ആകാഷ് ചിക്‌തെ ഇന്ത്യയെ ത്രസിപ്പിക്കുന്ന വിജയത്തിലേക്ക് നയിക്കുകയായിരുന്നു. നിശ്ചിത സമയത്ത് 31ാം മിനുട്ടില്‍ ഗുര്‍ജന്ത് സിങ്, 35ാം മിനുട്ടില്‍ ഹര്‍മന്‍പ്രീത് സിങ്, 47ാം മിനുട്ടില്‍ രുപിന്ദര്‍ പാല്‍ സിങ് എന്നിവരാണ് ഇന്ത്യക്കായി ഗോള്‍ നേടിയത്. ഇംഗ്ലണ്ട്- അര്‍ജന്റീന പോരാട്ടത്തിലെ വിജയികളാണ് സെമിയില്‍ ഇന്ത്യയുടെ എതിരാളികള്‍. ഇന്നലെ നടന്ന മറ്റൊരു പോരാട്ടത്തില്‍ ആസ്‌ത്രേലിയ 4-1ന് സ്‌പെയിനിനെ വീഴ്ത്തി സെമിയിലേക്ക് കടന്നു.