ജറൂസലം: ഇസ്‌റാഈല്‍ തലസ്ഥാനമായി ജറൂസലമിനെ യു.എസ് പ്രഖ്യാപിച്ചതിനെതിരേ ഫലസ്തീനിലും ഇസ്‌റാഈലിലും നടന്ന പ്രതിഷേധത്തില്‍ 16 ഫലസ്തീനികള്‍ക്ക് പരുക്ക്.
റാമല്ല, ബത്‌ലഹേം എന്നിവിടങ്ങളില്‍ നടന്ന പ്രതിഷേധമാണ് സംഘര്‍ഷത്തിനിടയാക്കിയത്. പ്രതിഷേധക്കാര്‍ക്കുനേരെ പൊലിസ് ടിയര്‍ ഗ്യാസ്, റബ്ബര്‍ ബുള്ളറ്റ് എന്നിവ ഉപയോഗിക്കുകയായിരുന്നു. ജറൂസലമില്‍ ഇസ്‌റാഈല്‍ സുരക്ഷാ സേനക്കെതിരേ പ്രതിഷേധക്കാര്‍ കല്ലെറിഞ്ഞതാണ് സംഘര്‍ഷത്തിനിടയാക്കിയത്.
യു.എസിന്റെ പ്രഖ്യാപനവുമായി ബന്ധപ്പെട്ട് ഫലസ്തീന്‍, ഇസ്‌റാഈല്‍ നേതാക്കള്‍ നടത്തിയ പ്രസ്താവനകള്‍ മേഖല സംഘര്‍ഷത്തിലേക്ക് നീങ്ങുന്നുവെന്ന സൂചനയാണ് നല്‍കുന്നത്. ജറൂസലമിനെ തലസ്ഥാനമായി അംഗീകരിച്ചതിലൂടെ ട്രംപിന് വളരെയധികം നന്ദിയുണ്ടെന്ന് ഇസ്‌റാഈല്‍ പ്രധാനമന്ത്രി ബെഞ്ചമിന്‍ നെതന്യാഹു പറഞ്ഞു. നിലവിലെ യു.എസ് എംബസി ജറൂസലമിലേക്ക് ഉടന്‍ മാറ്റുമെന്ന് പ്രതീക്ഷിക്കുന്നതായും മറ്റ് രാഷ്ട്രങ്ങളും ഇതേ നിലപാട് പിന്തുടരുമെന്നും നെതന്യാഹു പറഞ്ഞു.
യു.എസ് തീരുമാനത്തിനെതിരേ ഫലസ്തീനികള്‍ ഐക്യത്തോടെ പ്രതിഷേധവുമായി രംഗത്തിറങ്ങണമെന്നും ഇന്ന് രോഷത്തിന്റെ ദിനമായി ആചരിക്കണമെന്നും ഹമാസ് നേതാവ് ഇസ്മായില്‍ ഹനിയ്യ ജനങ്ങളോട് ആവശ്യപ്പെട്ടു. ഹമാസ് അംഗങ്ങള്‍ സജ്ജരായിരിക്കണം. സാഹചര്യം വിലയിരുത്തി നിര്‍ദേശങ്ങള്‍ക്കനുസരിച്ച് നീങ്ങണമെന്നും ഇസ്മായില്‍ ഹനിയ്യ പറഞ്ഞു. എന്നാല്‍, ഫലസ്തീന്‍ സര്‍ക്കാര്‍ നയതന്ത്ര നീക്കത്തിലൂടെ യു.എസ് പ്രഖ്യാപനത്തെ തടയിടാനുള്ള ശ്രമമാണ് നടത്തുന്നത്. അറബ് ലീഗിലും യു.എന്‍ സുരക്ഷാ സമിതിയിലും യു.എസ് നീക്കത്തിനെതിരേ ഫലസ്തീന്‍ പ്രസിഡന്റ് പരാതികള്‍ സമര്‍പ്പിച്ചു.
ഇസ്‌റാഈല്‍, ഫലസ്തീന്‍ സമാധാനശ്രമങ്ങളില്‍ ഇടപെടാന്‍ യു.എസിന് ഇനിമുതല്‍ യോഗ്യതയില്ലെന്ന് ഫലസ്തീന്‍ വക്താവ് നാസര്‍ അല്‍ക്വദ്വ പറഞ്ഞു.