ലണ്ടന്‍: ജയം കാണാതെ എട്ട് മത്സരങ്ങള്‍ പൂര്‍ത്തിയാക്കി ഒന്‍പതാം പോരിനിറങ്ങിയ വെസ്റ്റ് ഹാം യുനൈറ്റഡ് നിലവിലെ ചാംപ്യന്‍മാരായ ചെല്‍സിയെ സ്വന്തം തട്ടകത്തില്‍ മറുപടിയില്ലാത്ത ഒറ്റ ഗോളിന് വീഴ്ത്തി വിജയ വഴിയിലെത്തി. വെസ്റ്റ് ഹാം യുനൈറ്റഡിന്റെ പരിശീലകനായി ചുമതലയേറ്റ ഡേവിഡ് മോയസ് ടീമിനൊപ്പം ആദ്യ വിജയവും ആഘോഷിച്ചു. കളിയുടെ ആറാം മിനുട്ടില്‍ അര്‍ണൗടോവിച് നേടിയ ഏക ഗോളിലാണ് വെസ്റ്റ് ഹാം വിജയം സ്വന്തമാക്കിയത്. കളിയുടെ തുടക്കം മുതല്‍ ആക്രമിച്ച് മുന്നേറിയ വെസ്റ്റ് ഹാം അതിന്റെ ഫലം തുടക്കത്തില്‍ തന്നെ അനുഭവിക്കുകയായിരുന്നു. പിന്നീട് ചെല്‍സിയുടെ താര നിര ഗോള്‍ മടക്കാന്‍ ആവുന്നതൊക്കെ ചെയ്‌തെങ്കിലും വെസ്റ്റ് ഹാം പ്രതിരോധം ഉലയാതെ സമര്‍ഥമായി അതിന്റെ മുനയൊടിച്ചു.
കരുത്തരായ ടോട്ടനം ഹോട്‌സ്പര്‍ സ്വന്തം തട്ടകത്തില്‍ സ്റ്റോക് സിറ്റിയെ 5-1ന് തകര്‍ത്തു. ഹാരി കെയ്ന്‍ ഇരട്ട ഗോളുകളുമായി കളം നിറഞ്ഞ പോരാട്ടത്തിലാണ് ടോട്ടനത്തിന്റെ തകര്‍പ്പന്‍ ജയം. ആദ്യ പകുതിയില്‍ സെല്‍ഫ് ഗോളിലൂടെ ലീഡ് സ്വന്തമായ ടോട്ടനം രണ്ടാം പകുതിയിലാണ് ശേഷിച്ച നാല് ഗോളുകളും വലയിലാക്കിയത്.
മറ്റ് മത്സരങ്ങളില്‍ ബേണ്‍ലി 1-0ത്തിന് വാട്‌ഫോര്‍ഡിനേയും ഹഡ്ഡേഴ്‌സ്ഫീല്‍ഡ് 2-0ത്തിന് ബ്രൈറ്റനേയും സ്വാന്‍സീ സിറ്റി 1-0ത്തിന് വെസ്റ്റ് ബ്രോംവിചിനേയും പരാജയപ്പെടുത്തി. ക്രിസ്റ്റല്‍ പാലസ്- ബേണ്‍മൗത്ത് പോരാട്ടം 2-2ന് സമനില.

ബയേണ്‍ മുന്നോട്ട്
മ്യൂണിക്ക്: ജര്‍മന്‍ ബുണ്ടസ് ലീഗയില്‍ ബയേണ്‍ മ്യൂണിക്ക് കുതിപ്പ് തുടരുന്നു. എവേ പോരാട്ടത്തില്‍ മറുപടിയില്ലാത്ത ഒറ്റ ഗോളിന് അവര്‍ ഫ്രാങ്ക്ഫര്‍ടിനെ വീഴ്ത്തി. 20ാം മിനുട്ടില്‍ ആര്‍തുറോ വിദാലാണ് ബാവേറിയന്‍സിനായി വല ചലിപ്പിച്ചത്. മറ്റ് മത്സരങ്ങളില്‍ വെര്‍ഡര്‍ബ്രെമന്‍ 2-1 ബൊറൂസിയ ഡോര്‍ട്മുണ്ടിനെ അവരുടെ തട്ടകത്തില്‍ വീഴ്ത്തി. ലെവര്‍കൂസന്‍ 2-0ത്തിന് സ്റ്റുര്‍ട്ട്ഗര്‍ടിനേയും കീഴടക്കി. ലെയ്പ്‌സിഗ്- മെയ്ന്‍സ് പോരാട്ടം 2-2ന് സമനില.