ന്യൂഡല്‍ഹി: വിമാന യാത്രക്കിടെ ദംഗല്‍ സിനിമാ താരം സൈറ വസീമിനെതിരേ അതിക്രമം കാണിച്ച ആളെ പൊലിസ് അറസ്റ്റ് ചെയ്തു. ഡല്‍ഹി- മുംബൈ യാത്രയ്ക്കിടെ പിറകിലെ സീറ്റിലിരുന്നയാള്‍ അപമാനിച്ചുവെന്ന് ഇന്‍സ്റ്റഗ്രാം വിഡിയോയിലൂടെ സൈറ പറഞ്ഞിരുന്നു.
വിമാനത്തില്‍ പാതിയുറക്കത്തിലിരിക്കെ തന്റെ പിറകിലും കഴുത്തിലും പിന്നിലെ സീറ്റിലിരുന്നയാള്‍ കാലുകൊണ്ട് ഉരസിയെന്നാണ് ആരോപണം. വിസ്താര എയര്‍ലൈന്‍സിന്റെ വിമാനത്തില്‍ യാത്രചെയ്യവെയാണ് സംഭവം. സൈറയുടെ പരാതിയുടെ അടിസ്ഥാനത്തില്‍ മുംബൈ പൊലിസാണ് ഇയാളെ അറസ്റ്റ് ചെയ്തത്. എന്നാല്‍ പ്രതിയുടെ പേര് പൊലിസ് വെളിപ്പെടുത്തിയിട്ടില്ല.
പത്തു മിനിറ്റോളം തന്റെ കഴുത്തു മുതല്‍ പിറകു വരെ അയാളുടെ കാല്‍ സഞ്ചരിച്ചു. താന്‍ ആദ്യം അത് അവഗണിച്ചു. എന്താണ് സംഭവിക്കുന്നതെന്ന് അല്‍പ്പ സമയം കാത്തു നിന്നു. അയാളുടെ ഇരിപ്പ് ശരിയല്ലാത്തതുകൊണ്ട് കാല്‍ തട്ടിയതാകാമെന്ന് കരുതിയതെന്നും നടി പറഞ്ഞു.
നടിക്കുനേരെയുണ്ടായ അതിക്രമത്തിന്റെ പശ്ചാത്തലത്തില്‍ മഹാരാഷ്ട്ര സംസ്ഥാന വനിതാ കമ്മിഷന്‍ അന്വേഷണം പ്രഖ്യാപിച്ചിരുന്നു.