ബെയ്ജിങ്: ചൈനയിലെ പ്രസിദ്ധനായ അംബരച്ചുംബി ആരോഹകന്‍ 62 നില കെട്ടിടത്തില്‍നിന്നു താഴെ വീണു മരിച്ചു. ഉയരം കൂടിയെ കെട്ടിടങ്ങളുടെ ചുമരില്‍ പിടിച്ചുകയറി പതിനായിരക്കണക്കിന് ആരാധകരെ സൃഷ്ടിച്ച വു യോങ്‌നിങ് ആണ് പതിവ് കെട്ടിട ആരോഹണ സാഹസത്തിനിടെ അപകടത്തില്‍പെട്ടത്.
ചാങ്ഷാ നഗരത്തിലെ 62 നില കെട്ടിടത്തില്‍ സാഹസികാഭ്യാസത്തിനിടെയാണ് അപകടമുണ്ടായത്. വലിയ തുകയ്ക്കുള്ള വെല്ലുവിളി ഏറ്റെടുത്ത് അഭ്യാസത്തിനിറങ്ങിയതായിരുന്നു 28കാരനായ യോങ്‌നിങ് എന്ന സര്‍ക്കാര്‍ വൃത്തങ്ങള്‍ പറഞ്ഞു. കഴിഞ്ഞ മാസം എട്ടിനു യുവാവ് മരിച്ചതായി വാര്‍ത്ത പരന്നിരുന്നു. കഴിഞ്ഞ ദിവസം യോങ്‌നിങ്ങിന്റെ കാമുകി വാര്‍ത്ത സമൂഹമാധ്യമങ്ങളില്‍ സ്ഥിരീകരിച്ചതോടെയാണ് ഇക്കാര്യത്തില്‍ പരന്ന അഭ്യൂഹങ്ങള്‍ക്ക് അറുതിയായത്.
സമൂഹമാധ്യമമായ വെയ്‌ബോ വഴിയാണ് കെട്ടിട സാഹസങ്ങളുടെ വിഡിയോ യോങ്‌നിങ് പുറത്തുവിടാറ്. തന്റെ അഭ്യാസങ്ങള്‍ ആരും അനുകരിക്കരുതെന്നും അദ്ദേഹം വിഡിയോയില്‍ നിര്‍ദേശിക്കാറുണ്ടായിരുന്നു.