അബൂദബി: നിലവിലെ ചാംപ്യന്‍മാരായ റയല്‍ മാഡ്രിഡ് ഫിഫ ക്ലബ് ലോകകപ്പിന്റെ ഫൈനലിലേക്ക് കടന്നു. എമിരറ്റി ചാംപ്യന്‍മാരായ അല്‍ ജസീറയെ 2-1ന് പരാജയപ്പെടുത്തിയാണ് റയല്‍ ഫൈനലിലേക്ക് കടന്നത്.
ആദ്യ പകുതിയില്‍ ഒരു ഗോളിന് പിന്നില്‍ നിന്ന ശേഷം രണ്ടാം പകുതിയില്‍ സൂപ്പര്‍ താരം ക്രിസ്റ്റ്യാനോ റൊണാള്‍ഡോ, ഗെരത് ബെയ്ല്‍ എന്നിവര്‍ നേടിയ ഗോളിലാണ് റയല്‍ വിജയം സ്വന്തമാക്കിയത്. 53ാം മിനുട്ടില്‍ ക്രിസ്റ്റ്യാനോ സമനില ഗോള്‍ നേടിയപ്പോള്‍ 81ാം മിനുട്ടില്‍ ബെയ്ല്‍ വിജയ ഗോള്‍ വലയിലാക്കി. ഈ ഗോളോടെ ക്ലബ് ലോകകപ്പില്‍ ഏറ്റവും കൂടുതല്‍ ഗോള്‍ നേടുന്ന താരമെന്ന റെക്കോര്‍ഡ് ക്രിസ്റ്റ്യാനോ സ്വന്തമാക്കി. അഞ്ച് വീതം ഗോളുകള്‍ നേടി മുന്നിലുണ്ടായിരുന്ന ബാഴ്‌സലോണ സൂപ്പര്‍ താരങ്ങളായ ലയണല്‍ മെസ്സി, ലൂയീസ് സുവാരസ് എന്നിവരുടെ റെക്കോര്‍ഡാണ് പോര്‍ച്ചുഗല്‍ നായകന്‍ മറികടന്നത്.
നാളെ നടക്കുന്ന ഫൈനലില്‍ ബ്രസീലിയന്‍ ക്ലബ് ഗ്രെമിയോ ആണ് റയലിന്റെ എതിരാളികള്‍. മെക്‌സിക്കന്‍ ക്ലബ് പചുക്കയെ 1-0ത്തിന് പരാജയപ്പെടുത്തിയാണ് ഗ്രെമിയോ കലാശപ്പോരിനെത്തുന്നത്. നാളെ വിജയിച്ചാല്‍ റയലിന്റെ മൂന്നാം ക്ലബ് ലോകകപ്പ് കിരീടമായി അത് മാറും. ഏറ്റവും കൂടുതല്‍ കിരീടം നേടിയതിന്റെ റെക്കോര്‍ഡ് ബാഴ്‌സലോണയ്ക്കാണ്. വിജയിച്ചാല്‍ ഈ റെക്കോര്‍ഡിനൊപ്പമെത്താനും റയലിന് സാധിക്കും.