ന്യൂഡല്‍ഹി: രാഹുല്‍ സന്ദര്‍ശിച്ചതുകൊണ്ട് ഓഖി ദുരന്ത സ്ഥലങ്ങള്‍ സന്ദര്‍ശിക്കാന്‍ പ്രധാനമന്ത്രി നിര്‍ബന്ധിതനായതാണെന്ന് പ്രതിപക്ഷ നേതാവ് രമേശ് ചെന്നിത്തല. പ്രധാനമന്ത്രി ഒരു കാഴ്ച വിരുന്നിനായി കേരളത്തില്‍ വരേണ്ടതില്ല. അത്തരമൊരു അവസ്ഥയിലല്ല ഇപ്പോള്‍ കേരളം. ഡല്‍ഹിയില്‍ മാധ്യമപ്രവര്‍ത്തകരുമായി സംസാരിക്കുകയായിരുന്നു അദ്ദേഹം.
കേരളത്തില്‍ ഒരു തെരഞ്ഞെടുപ്പ് നടക്കുന്ന സമയമാണെങ്കില്‍ പ്രധാനമന്ത്രി ഇതിന് മുന്‍പേ കേരളത്തിലെത്തുമായിരുന്നു. 2000 കോടിയുടെ പ്രത്യേക പാക്കേജ് പ്രഖ്യാപിക്കാന്‍ പ്രധാനമന്ത്രി തയാറാവണം. കടലോരങ്ങളുടെ അടിസ്ഥാന വികസനം, സുരക്ഷിതത്വം പുലിമുട്ട്, കടല്‍ ഭിത്തി എന്നിവ നിര്‍മിക്കാനുള്ള നടപടികള്‍ സ്വീകരിക്കുകയാണ് ഇപ്പോള്‍ വേണ്ടത്. ഓഖി ദുരന്തത്തില്‍ മരിച്ചവര്‍ക്ക് പാര്‍ലമെന്റില്‍ ഒരു അനുശോചനം രേഖപ്പെടുത്താന്‍ പോലും കേന്ദ്രം തയാറാവാത്തത് പ്രതിഷേധാര്‍ഹമാണ്.
സംസ്ഥാന സര്‍ക്കാര്‍ കേന്ദ്രത്തില്‍ സമര്‍പ്പിച്ച പാക്കേജ് അപര്യാപ്തമാണ്. 2000 കോടിയുടെ പാക്കേജ് വേണമെന്നാണ് പ്രതിപക്ഷത്തിന്റെ ആവശ്യം. എത്രപേര്‍ മരിച്ചുവെന്നും കാണാതായെന്നുമുള്ള കണക്ക് സംസ്ഥാന സര്‍ക്കാരിന്റെ കൈവശമില്ല. ദുരന്തത്തിന്റെ മുന്നറിയിപ്പ് നല്‍കുന്ന കാര്യത്തില്‍ കേന്ദ്രവും നല്‍കിയ ഉത്തരവ് നടപ്പാക്കുന്ന കാര്യത്തില്‍ കേരള സര്‍ക്കാരും പരാജയപ്പെട്ടു. ഇപ്പോഴും തീരദേശം ഭീതിയിലും പട്ടിണിയിലുമാണെന്നും ചെന്നിത്തല പറഞ്ഞു.