ജനുവരി ഒന്ന് മുതല്‍ മാരുതി കാറുകളുടെയും വില വര്‍ധിക്കും. ഉത്പാദന ചെലവ് വര്‍ധിച്ചതിനാല്‍ പുതുവര്‍ഷത്തില്‍ കാറുകളില്‍ രണ്ട് ശതമാനം വരെ വില വര്‍ധനവ് നടപ്പിലാകുമെന്നാണ് ഇന്ത്യയിലെ ഏറ്റവും വലിയ കാര്‍ നിര്‍മ്മാതാക്കളായ മാരുതി പ്രഖ്യാപിച്ചത്.

2.49 ലക്ഷം രൂപ എക്‌സ്‌ഷോറൂം വിലയില്‍ എത്തുന്ന എന്‍ട്രിലെവല്‍ ഹാച്ച്ബാക്ക് ആള്‍ട്ടോ 800 മുതല്‍ 11.29 ലക്ഷം രൂപ പ്രൈസ് ടാഗുമായുള്ള ക്രോസ്ഓവര്‍ എസ്‌ക്രോസ് വരെയുള്ള മോഡലുകളാണ് മാരുതി സുസുക്കി ഇന്ത്യയില്‍ വില്‍ക്കുന്നത്.

കഴിഞ്ഞ മാസങ്ങളില്‍ ഉല്‍പ്പന്നങ്ങളുടെ വില ക്രമാതീതമായി ഉയര്‍ന്നിട്ടുണ്ട്. ഇതു മൂലമുള്ള അധിക ബാധ്യത ഇതുവരെ കമ്പനി ഏറ്റെടുക്കുകയായിരുന്നു. ഇതോടെയാണ് ജനുവരിയില്‍ വില വര്‍ധിപ്പിക്കാന്‍ കമ്പനി തീരുമാനിച്ചത്.

മാരുതിയ്ക്ക് പുറമെ ഫോക്‌സ്‌വാഗണ്‍, ഫോര്‍ഡ്, ടാറ്റ, ടൊയോട്ട, ഹോണ്ട, സ്‌കോഡ, ഇസുസു എന്നീ നിര്‍മ്മാതാക്കളും പുതുവര്‍ഷത്തില്‍ കാര്‍ വില വര്‍ധിക്കുമെന്ന് പ്രഖ്യാപിച്ചിട്ടുണ്ട്.