മോസ്‌കോ: സിറിയയില്‍ ബഷാറിന്റെ എതിരാളികളെ നേരിടാന്‍ റഷ്യ നടത്തുന്ന ആക്രമണങ്ങള്‍ക്ക് ഇറാന്റെ സഹായം. ഇന്നു നടത്തിയ ബോംബിങിനായി റഷ്യയുടെ ജെറ്റ് വിമാനം പറന്നുയര്‍ന്നത് പശ്ചിമ ഇറാനിലെ ഹമദാന്‍ എയര്‍ബേസില്‍ നിന്നാണെന്ന് റഷ്യന്‍ പ്രതിരോധ മന്ത്രാലയം അറിയിച്ചു. ഇതാദ്യമായാണ് ഇറാനില്‍ നിന്ന് റഷ്യ ആക്രമണം നടത്തുന്നത്.

തുപോലെവ്-22എം3 ലോങ് റേഞ്ച്, സുഖോയ്-34 എന്നീ യുദ്ധവിമാനങ്ങളാണ് ഹമദാനില്‍ നിന്ന് പറന്നത്.

സിറിയയില്‍ ആക്രമണം നടത്തുന്നതിനായി ഇറാനെക്കൂടാതെ ഇറാഖിനോടും റഷ്യ അനുമതി ചോദിച്ചതായി റഷ്യന്‍ മാധ്യമങ്ങള്‍ റിപ്പോര്‍ട്ട് ചെയ്തു. ഇരുരാജ്യങ്ങളിലും കാസ്പിയന്‍ കടല്‍ അതിര്‍ത്തിയില്‍ നിന്ന് ആക്രമണം നടത്താന്‍ വേണ്ടിയാണിത്.

ഇദ്‌ലിബ്, അലെപ്പോ, ദാറല്‍ സോര്‍ എന്നീ സിറിയന്‍ നഗരങ്ങളിലെ ഐ.എസ് ഭീകരരെയും അല്‍ നുസ്ര ഫ്രണ്ട് അനുകൂലികളെയും തുരത്താനാണ് ബോംബിട്ടതെന്ന് റഷ്യന്‍ പ്രതിരോധ മന്ത്രാലയം അറിയിച്ചു.