കൊന്നില്ലായവര്‍ മര്‍യമിന്‍ മകനെ,
കൊന്നില്ലവര്‍ കുരിശിലും ക്രിസ്തുവായവനെ!
എന്നാകിലും സാദൃശ്യമതിന്റെതവര്‍ക്കു ദൃശ്യം(1)
വന്നാനതൊരാശയമായ് ജനതയ്ക്കു സത്യം.

പരമകാരുണികന്‍ തന്‍ വചനമായ്(2)
പരമനീതിയതിന്‍ സ്രോതസില്‍നിന്നായ്
വന്നാനവന്‍ യേശു, അവന്‍ സ്വയമൊരാശയം
സന്ദേശമാ ജന്മം, ജീവിതം, വിയോഗം

'വചനം!' അതിന്നര്‍ഥമിഹ സന്ദേശം,
'വചന'മായ് പിറന്നിവിടെയവന്‍ സുസ്മിതം.
അവനൊരു മഹപ്രഖ്യാപനം!
അതടിമത്ത നിരാസ വിളംബരം.

പിറന്നപാടവന്‍ ചൊല്ലിയതാ മന്ത്രം
പറഞ്ഞവന്‍ 'ഞാനീശ്വര ദാസന്‍ മാത്രം'(3)
എന്നടിമത്തമുടയോനു മാത്രം,
എന്നുടയവനേക ദൈവം മാത്രം.

'വചന'മത്, സന്ദേശമത് മര്‍യമിന്‍
വയറ്റിലൂടെ വന്ന മനുഷ്യ സന്താനമായ്(4),
'വചന'മതു പക്ഷെ ദൈവമാകില്ലന്യൂനം;
ദൈവബഹുത്വമിഹ, എന്തിനധികമൊരെണ്ണം?

'വചന'മെന്നാല്‍ പരമനീതിയില്‍നിന്നായ്
വന്നിറങ്ങുന്ന സന്ദേശമിഹ ജനത്തിന്നായ്,
ഒരു മഹാശയം, വിഗ്രഹമല്ലതൊരിക്കലും,
അതടിമത്ത നിരാസം, മഹാവിമോചനം.

അടിമകളുടമകളെന്നീ വര്‍ഗഭേദമിഹം;
ഉടമകളവര്‍ രാജാക്കള്‍, മതപുരോഹിതരും തഥാ
അടിമകളോ മഹാജനഗണം
അടികിട്ടും പണിയാളര്‍ അവര്‍ ക്രൂശിതര്‍!

അവരില്‍പെടുമൊരു ക്രൂശിതനിപ്പോഴവന്‍,
അവനോ 'വചന'മായ് വന്നിറങ്ങിയ മാനുഷന്‍!
ചുമലില്‍ ചുമന്നവന്‍ കുരിശു പിന്നെയോ,
ചമഞ്ഞാനവനിഹ ക്രൂശിതനെന്നപോല്‍!

സത്യമെന്നാലിവിടെയൊരു പ്രകടനം,
ക്രൂശിതനായ് വെളിപ്പെടലെന്നതൊരാശയം.
പരിഹാരം തേടുന്നൊരു പ്രശ്‌നമിഹം
അതിന്‍ പ്രകാശനമീ മഹാനാടകം.

അതൊക്കെയാണ് 'വചനം'
അതിലൂടെ വിമോചിതരാകും ജനം.
പ്രകടനമാകും മരണം, പക്ഷെ അതമരത്വ വിളംബരം
പ്രഘോഷിച്ചവനുയര്‍ന്നു പോയ് അവിടേക്കായ്.

മഹാസന്നിധാനവന്റെ വിശ്രമസ്ഥലം,
മഹാപുരോഹിതനു പക്ഷെയവന്‍ മൃതന്‍, ക്രൂശിതന്‍
നൂറ്റാണ്ടുകള്‍ കഴിഞ്ഞിറങ്ങി 'വചന'മക്ഷരത്തില്‍
കൊന്നില്ലവര്‍ അവനെ, കുരിശിലേതൊരലങ്കാരം(5).

കുരിശവര്‍ നാട്ടിയതവനെ നിഹനിപ്പാന്‍
കുരിശോ പക്ഷെ തകരുമവന്‍ നിമിത്തമായ്!
പൊട്ടിക്കുമതവന്‍, തകര്‍ക്കുമതിന്‍ ഭരണം(6).
പട്ടിണിക്കായ് അവനിറങ്ങി വരും ഭൂമിയില്‍.
(തുടരും)

(1) ഖുര്‍ആന്‍- 4:157
(2) ഖുര്‍ആന്‍- 3:44
(3) ഖുര്‍ആന്‍- 19:30
(4) ഖുര്‍ആന്‍- 3:44
(5) ഖുര്‍ആന്‍- 4:157
(6) രണ്ടാം വരവില്‍ യേശു കുരിശ് തകര്‍ക്കുമെന്നു പ്രവാചകന്‍ മുഹമ്മദ് നബി പറഞ്ഞതായി രേഖപ്പെടുത്തപ്പെട്ടത്.