കണ്ണൂര്‍: ഗെയില്‍ വാതക പൈപ്പ്‌ലൈന്‍ സ്ഥാപിക്കുന്നതില്‍നിന്നു ജനവാസ മേഖലയെ ഒഴിവാക്കണമെന്ന് ആവശ്യപ്പെട്ട് ഗ്യാസ് പൈപ്പ്‌ലൈന്‍ വിക്ടിംസ് ഫോറം ജില്ലാകമ്മിറ്റി 19നു രാവിലെ 10ന് കലക്ടറേറ്റിനു മുന്നില്‍ ധര്‍ണ നടത്തും. പി.സി ജോര്‍ജ് എം.എല്‍.എ ഉദ്ഘാടനം ചെയ്യും. നിയമവിരുദ്ധവും ജനവിരുദ്ധവുമായി കോര്‍പറേറ്റ് ഭീമന്‍മാര്‍ക്ക് ഇടനാഴി ഒരുക്കാനാണു കൊച്ചി-ബംഗളൂരു, കൊച്ചി-മംഗളൂരു ഹൈ പ്രഷര്‍ വാതക പൈപ്പ്‌ലൈന്‍ സ്ഥാപിക്കാന്‍ ശ്രമം നടത്തുന്നത് ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു. രഹസ്യമായാണു ഗെയില്‍ കമ്പനിയുടെ നീക്കം. പദ്ധതി നടപ്പാക്കാനുള്ള അമിത വ്യഗ്രത, അഴിമതി നടന്നിട്ടുണ്ടോ എന്ന സംശയം ബലപ്പെടുത്തുകയാണെന്നും അവര്‍ പറഞ്ഞു.        നിര്‍ദിഷ്ട നിയമവിരുദ്ധ പദ്ധതിയുടെ റൂട്ട് റദ്ദാക്കുക, 1962ലെ പി ആന്‍ഡ് എം.പി ആക്ട് പരിരക്ഷ ഉറപ്പാക്കുക തുടങ്ങിയ ആവശ്യങ്ങളുന്നയിച്ചാണു ധര്‍ണ. എ  ഗോപാലന്‍, യു.കെ സെയ്ദ്, പി രാമര്‍കുട്ടി, ജയചന്ദ്രന്‍ സംബന്ധിച്ചു.