കോഴിക്കോട്: കേന്ദ്ര ഹജ്ജ് കമ്മിറ്റി ചെയര്‍മാനായി തെരഞ്ഞെടുക്കപ്പെട്ട ശേഷം ആദ്യമായി കോഴിക്കോട്ടെത്തിയ ചൗധരി മെഹബൂബ് അലി കൈസര്‍ എം.പിക്ക് പൗരവാലിയുടെ ആഭിമുഖ്യത്തില്‍ സ്വീകരണം നല്‍കി. അളകാപുരി ഓഡിറ്റോറിയത്തില്‍ നടന്ന ചടങ്ങ് കേന്ദ്ര ഹജ്ജ് കമ്മിറ്റിയംഗം ഇ.ടി മുഹമ്മദ് ബഷീര്‍ എം.പി ഉദ്ഘാടനം ചെയ്തു. ഇന്ത്യയില്‍ നിന്നുള്ള ഹജ്ജ് തീര്‍ഥാടകര്‍ക്ക് കൂടുതല്‍ സൗകര്യമൊരുക്കാനുള്ള തയാറെടുപ്പുകള്‍ പൂര്‍ത്തിയായി വരികയാണെന്ന് ചെയര്‍മാന്‍ പറഞ്ഞു. സഊദിയില്‍ ഹാജിമാര്‍ക്കുള്ള താമസ സൗകര്യമുള്‍പ്പടെയുള്ള കാര്യങ്ങള്‍ നിയന്ത്രിക്കാനായി ഹജ്ജ് കമ്മിറ്റി അംഗങ്ങളുടെ നേതൃത്വത്തിലുള്ള സംഘം അവിടെയുണ്ടാകുമെന്നും അദ്ദേഹം പറഞ്ഞു. കരിപ്പൂരില്‍ നിന്നുള്ള ഹജ്ജ് സര്‍വിസുകള്‍ പുനഃസ്ഥാപിക്കാന്‍ സര്‍ക്കാരില്‍ സമ്മര്‍ദം ചെലുത്തുമെന്നും ചെയര്‍മാന്‍ കൂട്ടിച്ചേര്‍ത്തു. എല്‍.ജെ.പി സംസ്ഥാന പ്രസിഡന്റ് എം. മെഹബൂബ് അധ്യക്ഷനായി. ചൗധരി മെഹബൂബ് അലി കൈസര്‍ എം.പിക്ക് ഇ.ടി മുഹമ്മദ് ബഷീര്‍ എം.പി ഉപഹാരം സമ്മാനിച്ചു. സംസ്ഥാന ഹജ്ജ് കമ്മിറ്റി ചെയര്‍മാന്‍ കോട്ടുമല ടി.എം ബാപ്പു മുസ്‌ലിയാര്‍, രമാ ജോര്‍ജ്, ഒ.എസ് അബ്ദുല്ല, എ.പി അബ്ദുല്‍ വഹാബ്, മുസ്തഫ കൊമ്മേരി, സാജു വടശ്ശേരി, പി.എച്ച് രാമചന്ദ്രന്‍, യു.എ അദീബ്, കെ. സജാദ് സംസാരിച്ചു. എല്‍.ജി.പി സംസ്ഥാന സെക്രട്ടറി മുഹമ്മദ് ഇഖ്ബാല്‍ ഖാന്‍ സ്വാഗതവും സാജു ജോയ്‌സണ്‍ നന്ദിയും പറഞ്ഞു.