ഉമ്മു ഹബീബ

ബാല്യമെത്ര മനോഹരമെന്ന്
കുറിച്ചുകൊണ്ടിരിക്കെയാണ്
ഗസ്സയില്‍ ബോംബുപൊട്ടിയതും
മുവ്വായിരം പൂമൊട്ടുകള്‍
ഞെട്ടറ്റുവീണതും.
പത്രമച്ചടിച്ച ഭാസ്‌കരേട്ടന്‍
നെഞ്ചുപൊട്ടി മരിച്ചതും
പത്രം വായിച്ച നെതന്യാഹു
പൊട്ടിച്ചിരിച്ചതും
കുഞ്ഞിന്റെ നെഞ്ചിലെ തുളകണ്ടാണ്!
ഞാന്‍ കല്ലുതട്ടി വീണകാലത്ത്
അവര്‍ വെടിയുണ്ടയേറ്റ് മരിക്കുന്നു.
ഞാന്‍ നായയെയും പട്ടിയെയും
ഭയന്നോടിയ കാലത്ത്
അവര്‍ തോക്കിന്‍മുനയ്ക്കുമുമ്പ്
നെഞ്ചുവിരിച്ചുനില്‍ക്കുന്നു.
യുദ്ധമെന്ന കളരിയിലെ
ഏറ്റവും നല്ല കളിക്കാരന്‍
താങ്കളാണെന്ന് ബ്ലിങ്കന്‍ പറഞ്ഞപ്പോള്‍
നെതന്യാഹു നന്ദിയുണ്ടെന്ന് മന്ദഹസിച്ചു.
അവാര്‍ഡ് വൈകാതെ വേണമെന്ന്
ബൈഡനോട് അടക്കം പറഞ്ഞു.
എന്റെ നാരങ്ങാമിഠായിയുടെ
രുചിയിപ്പോഴും മുറിഞ്ഞിട്ടില്ല.
അവരുടെ മുറിപ്പാടുകളിലെ
ചാലുകളിപ്പോഴും വറ്റിയിട്ടില്ല.
കളിയവസാനിക്കുമ്പോള്‍,
ഒരൊറ്റ എതിരാളിയും
ബാക്കിനില്‍ക്കില്ലെന്ന,
നെതന്യാഹുവിന്റെ പ്രഖ്യാപനത്തിന്
ബൈഡന്റെ കൈയടിയുയുര്‍ന്നപ്പോള്‍
മനുഷ്യത്തിന്റെ കണ്ണുപൊട്ടി
ചുടുചോരയൊഴുകി.