ജയ് ഷാ വീണ്ടും ഏഷ്യന്‍ ക്രിക്കറ്റ് കൗണ്‍സില്‍ പ്രസിഡന്റ്; തെരഞ്ഞെടുക്കപ്പെടുന്നത് മൂന്നാം തവണ

കൊളംബോ: ഏഷ്യന്‍ ക്രിക്കറ്റ് കൗണ്‍സിലിന്റെ തലപ്പത്ത് ജയ് ഷാ ഒരു വര്‍ഷത്തേയ്ക്ക് കൂടി തുടരും. ഇന്ന് ചേര്‍ന്ന ഏഷ്യന്‍ ക്രിക്കറ്റ് കൗണ്‍സിലിന്റെ യോഗത്തിലാണ് തീരുമാനം. ശ്രീലങ്കന്‍ ക്രിക്കറ്റ് പ്രസിഡന്റ് ഷമി സില്‍വയാണ് ജയ് ഷായെ നാമനിര്‍ദ്ദേശം ചെയ്തത്. പിന്നാലെ എതിര്‍പ്പുകളില്ലാതെ അംഗങ്ങള്‍ നാമനിര്‍ദ്ദേശം അംഗീകരിച്ചു.

2021 ജനുവരിയിലാണ് ജയ് ഷാ ആദ്യമായി ഏഷ്യന്‍ ക്രിക്കറ്റ് കൗണ്‍സിലിന്റെ പ്രസിഡന്റായത്. രണ്ട് വര്‍ഷത്തേക്കായിരുന്നു കാലാവധി. 2023ല്‍ ഒരു വര്‍ഷത്തേക്ക് കൂടി വീണ്ടും പ്രസിഡന്റായി തെരഞ്ഞെടുക്കപ്പെട്ടു. ഒരു വര്‍ഷത്തേക്ക് കൂടി കാലാവധി നീട്ടിയതോടെ ഈ വര്‍ഷം നവംബറില്‍ നടക്കുന്ന രാജ്യാന്തര ക്രിക്കറ്റ് കൗണ്‍സില്‍ (ഐ.സി.സി) ചെയര്‍മാന്‍ തെരഞ്ഞെടുപ്പില്‍ ഏഷ്യന്‍ ക്രിക്കറ്റ് കൗണ്‍സില്‍ പ്രതിനിധിയായി ജയ് ഷാ മത്സരിച്ചേക്കും.