രക്ഷയായി ദുബൈ പൊലിസ് ഓപ്പറേഷൻ; ബോട്ടും കപ്പലും കൂട്ടിയിടിച്ചുണ്ടായ അപകടത്തിൽപെട്ടവർക്ക് അത്ഭുത രക്ഷപ്പെടൽ

ദുബൈ: മത്സ്യബന്ധന ബോട്ട് ചരക്ക് കപ്പലുമായി കൂട്ടിയിടിച്ചതിനെ തുടർന്ന് ദുബൈയിൽ അപകടം. സംഭവത്തിൽ മൂന്ന് പേർക്ക് പരിക്കേറ്റു. അപകടത്തിൽപ്പെട്ട എട്ട് നാവികരെ ദുബൈ പൊലിസ് രക്ഷപ്പെടുത്തി. പരുക്കേറ്റവരെ ഉടൻ വിമാനമാർഗം ദുബൈയിലെ റാഷിദ് ആശുപത്രിയിലെത്തിച്ച് ചികിത്സ നൽകി. അപകടത്തിൽ മത്സ്യബന്ധന ബോട്ട് തകർന്നു.

ദുബൈ പൊലിസിന്റെ സമയബന്ധിതമായ ഇടപെടലാണ് അപകടം കുറച്ചത്. രാത്രി വൈകി നടത്തിയ ഓപറേഷനിലാണ് എട്ട് നാവികരെ രക്ഷപ്പെടുത്തിയത്. തുറമുഖ പൊലിസ് സ്റ്റേഷനും എയർ വിങ് സെന്‍ററും ചേർന്നാണ് നാവികരെ രക്ഷപ്പെടുത്തിയത്. ശക്തമായ കാറ്റ് മൂലമുണ്ടായ ഉയർന്ന തിരമാലകൾക്കും കാലാവസ്ഥ വെല്ലുവിളികൾക്കിടയിലുമായിരുന്നു അതിസാഹസികമായി രക്ഷാപ്രവർത്തനം നടത്തിയത്.

എട്ട് നാവികരുമായി ദുബൈ ഫിഷ് മാർക്കറ്റ് വാട്ടർഫ്രണ്ടിലേക്ക് പോകുകയായിരുന്ന വാണിജ്യ ചരക്ക് കപ്പൽ മത്സ്യബന്ധന ബോട്ടുമായി കൂട്ടിയിടിച്ചായിരുന്നു അപകടമെന്ന് പോർട്ട് പൊലിസ് സ്റ്റേഷൻ ഡയറക്ടർ ബ്രി. ഡോ ഹസൻ സുഹൈൽ അൽ സുവൈദി പറഞ്ഞു. ചരക്ക് കപ്പൽ നിർത്തുന്നതിന് മുൻപ് ബോട്ട് രണ്ട് നോട്ടിക്കൽ മൈൽ ഒഴുകാൻ നിർബന്ധിതരായതാണ് ബോട്ട് തകരാൻ കാരണമായത്.