ഗസ്സയില്‍ മൂന്ന് ഇസ്‌റാഈല്‍ സൈനികര്‍ കൂടി കൊല്ലപ്പെട്ടു; മരണം 232 ആയി

തെല്‍അവീവ്: ഗസ്സയില്‍ മൂന്ന് ഇസ്‌റാഈല്‍ സൈനികരെ കൂടി കൊലപ്പെടുത്തി ഹമാസ്. തങ്ങളുടെ മൂന്ന് സൈനികര്‍ കൂടി കൊല്ലപ്പെട്ടതായി ഇസ്‌റാഈല്‍ തന്നെ വെളിപെടുത്തിയിട്ടുണ്ട്. രണ്ട് സൈനികര്‍ക്ക് പരിക്കേറ്റതായും ഇസ്‌റാഈല്‍ ഡിഫന്‍സ് ഫോഴ്‌സ് (ഐ.ഡി.എഫ്) അറിയിച്ചു. ഒരു കമാന്‍ഡറും രണ്ട് സൈനികരുമാണ് കൊല്ലപ്പെട്ടത്. ഇതോടെ ഗസ്സയില്‍ കൊല്ലപ്പെട്ട സൈനികരുടെ എണ്ണം 232 ആയെന്നും ഇസ്‌റാഈല്‍ ടൈംസ് റിപ്പോര്‍ട്ട് ചെയ്യുന്നു.

തെക്കന്‍ ഗസ്സയില്‍ ഇസ്‌റാഈലിന്റെ 630ാം ബറ്റാലിയനിലെ 36, 30, 27 വയസ്സുള്ള സൈനികരാണ് കൊല്ലപ്പെട്ടത്.

അതിനിടെ, 10 അധിനിവേശ ഇസ്‌റാഈല്‍ സൈനികരെ തങ്ങളുടെ പോരാളികള്‍ ഏറ്റുമുട്ടലില്‍ വധിച്ചതായി ഹമാസ് സായുധ വിഭാഗമായ ഖസ്സാം ബ്രിഗേഡ് ഇന്നലെ അറിയിച്ചു. തെക്കന്‍ ഗസ്സയിലെ ഖാന്‍ യൂനിസിനടുത്ത അബസന്‍ അല്‍ കബീറയിലാണ് ഏറ്റുമുട്ടല്‍ നടന്നത്. നേരിട്ടുള്ള പോരാട്ടത്തിലാണ് സൈനികരെ വധിച്ചതെന്ന് ഖസ്സാം ബ്രിഗേഡ് അറിയിച്ചു.

കൂടാതെ രണ്ട് ദിവസങ്ങളിലായി അഞ്ച് ഇസ്‌റാഈലി ബന്ദികള്‍ സയണിസ്റ്റ് സേന നടത്തിയ വ്യോമാക്രമണത്തില്‍ കൊല്ലപ്പെട്ടതായും ഖസ്സാം ബ്രിഗേഡ്‌സിന്റെ വക്താവ് അബു ഉബൈദ പറഞ്ഞു. എട്ടുപേര്‍ക്ക് പരിക്കേറ്റതായും ഇവരുടെ നില അതീവ ഗുരുതരാമാണെന്നും പ്രസ്താവനയില്‍ പറഞ്ഞു. ശരിയായ ചികിത്സ നല്‍കാന്‍ കഴിയാത്തതിനാല്‍ ഓരോ ദിവസവും ബന്ദികളുടെ ജീവന്‍ അപകടത്തിലാവുകയാണെന്ന് ഹമാസ് വ്യക്തമാക്കി. പരിക്കേറ്റ ബന്ദികളുടെ ജീവന്‍ നഷ്ടമായാല്‍, മരുന്നും അവശ്യവസ്തുക്കളും തടയുന്ന ഇസ്‌റാഈല്‍ സൈന്യത്തിന് മാത്രമാണ് ഉത്തരവാദിത്തമെന്ന് മുതിര്‍ന്ന ഹമാസ് നേതാവ് പറഞ്ഞു.