ഡല്‍ഹി: ദേശീയ ചലച്ചിത്ര പുരസ്‌ക്കാരങ്ങളുടെ പേര് മാറ്റാന്‍ തീരുമാനിച്ച് കേന്ദ്ര സര്‍ക്കാര്‍. ഇന്ധിരാഗാന്ധിയുടേയും നര്‍ഗ്ഗീസ് ദത്തിന്റേയും അടക്കമുള്ള പേരുകള്‍ ദേശീയ ചലച്ചിത്ര പുരസ്‌ക്കാരങ്ങളില്‍ നിന്നും പുറത്തായി. മികച്ച നവാഗത ചലച്ചിത്രത്തിനുള്ള സംവിധായകന് നല്‍കി വരുന്ന പുരസ്‌ക്കാരത്തില്‍ നിന്നാണ് ഇന്ദിരാഗാന്ധിയുടെ പേര് വെട്ടിമാറ്റിയിരിക്കുന്നത്. ദേശീയോദ്ഗ്രന്ഥനത്തിനുള്ള ചിത്രത്തിനുള്ള പുരസ്‌ക്കാരത്തില്‍ നിന്നും നര്‍ഗ്ഗീസ് ദത്തിനേയും ഒഴിവാക്കി.

കേന്ദ്ര വാര്‍ത്താ വിതരണ മന്ത്രാലയം രൂപവത്കരിച്ച സമിതിയുടെ ശുപാര്‍ശ പ്രകാരമാണ് അവാര്‍ഡുകളുടെ പേരുകള്‍ മാറ്റികൊണ്ട് ഉത്തരവിറക്കിയത്. സംവിധായകന്‍ പ്രിയദര്‍ശന്‍ അടക്കമുള്ള സമിതിയുടെ ശിപാര്‍ശ പ്രകാരമാണ് പേരുമാറ്റം.കൂടാതെ മറ്റ് പല പുതിയ പരിഷ്‌കാരങ്ങളും കമ്മിറ്റിയുടെ നിര്‍ദേശ പ്രകാരം സര്‍ക്കാര്‍ സ്വീകരിച്ചിട്ടുണ്ട്.ഇന്ദിരാ ഗാന്ധിയുടെ പേര് ഇല്ലാതെയായിരിക്കും മികച്ച നവാഗത സംവിധായകനുള്ള പുരസ്‌കാരം നല്‍കുക. നേരത്തെ നവാഗത സംവിധായകനുള്ള അവാര്‍ഡ് തുക നിര്‍മാതാവും സംവിധായകനും നല്‍കിയിരുന്നു.

എന്നാല്‍, ഇനി മുതല്‍ സംവിധായകന് മാത്രമായിരിക്കുംക്യാഷ് അവാര്‍ഡ് നല്‍കുക. ദേശീയോദ്ഗ്രഥന ചിത്രത്തിനുള്ള നര്‍ഗീസ് ദത്ത് അവാര്‍ഡ് ഇനി മുതല്‍ ദേശീയ, സാമൂഹിക, പാരിസ്ഥിതി മൂല്യങ്ങള്‍ പ്രോത്സാഹിപ്പിക്കുന്ന മികച്ച ചിത്രത്തിനുള്ള അവാര്‍ഡ് എന്ന പേരിലായിരിക്കും നല്‍കുക.