റിയാദ്: സഊദിയിലേക്കുള്ള യാത്രക്കാരുടെ ബാഗേജുകള്‍ കര്‍ശന പരിശോധനക്ക് വിധേയമാക്കുന്നു. അനുവദനീയമല്ലാത്ത മരുന്നുകള്‍ക്കുവേണ്ടിയുള്ള പരിശോധനയാണ് ശക്തമാക്കിയത്. മരുന്നുകള്‍ കണ്ടെത്തിയാല്‍ പരിശോധിച്ച് ഉറപ്പ് വരുത്തിയേ പുറത്തേക്ക് വിടൂ. കഴിഞ്ഞദിവസം ജിദ്ദയില്‍ ഇറങ്ങിയ മലയാളിയെ കര്‍ശന പരിശോധന നടത്തി മരുന്നുകള്‍ നിരോധിച്ചതല്ലെന്ന് ഉറപ്പ് വരുത്തിയാണ് കടത്തി വിട്ടത്. തിരുവനന്തപുരത്ത് നിന്ന് ജിദ്ദയിലെത്തിയ മലയാളി എന്‍ജിനീയറുടെ ലഗേജാണ് പരിശോധനക്ക് വിധേയമാക്കിയത്.

സുഹൃത്തിനുവേണ്ടിയാണ് മരുന്നു കൊണ്ടുവന്നിരുന്നത്. ഡോക്ടറുടെ പ്രിസ്‌ക്രിപ്ഷനും ബില്ലും ഉണ്ടായിരുന്നു. എക്‌സറേ സ്‌കാനിങ്ങില്‍ മരുന്നു കണ്ടതോടെ കസ്റ്റംസ് പെട്ടി തുറക്കാന്‍ ആവശ്യപ്പെട്ടു. മരുന്നുകള്‍ പരിശോധന നടത്തിയാണ് തിരിച്ചു നല്‍കിയത്.

നിരോധിക്കപ്പെട്ടവയാണെങ്കില്‍ എവിടെവെച്ചും പിടിക്കപ്പെടാം. വഴിയിലെ പരിശോധനകളിലും മരുന്നുകള്‍ കര്‍ശനമായി നോക്കുന്നുണ്ട്. കൈവശം ഉള്ള മരുന്നുകള്‍ സ്ഥിരമായി ഉപയോഗിക്കുന്നതാണെങ്കിലും വിലക്കുള്ളവയാണെങ്കില്‍ അകത്താകും.

പരിശോധനിയില്‍ കുഴപ്പമില്ലാത്ത മരുന്നുമായി മലയാളി യുവാവ് ഖമീസ് മുഷൈത്തില്‍ പിടിയിലായത് ആഴ്ചകള്‍ക്കുമുമ്പാണ്. ഉംറ യാത്രക്കിടെ പൊലിസ് ബസില്‍ നടത്തിയ പരിശോധനയില്‍ ഇയാളില്‍നിന്ന് കണ്ടെടുത്ത മരുന്നുകള്‍ അനുവദനീയമായവ ആയിരുന്നില്ല. സമാന കേസുകളില്‍ നിരവധി മലയാളികള്‍ പിടിയിലായിട്ടുണ്ട്. ഉംറ തീര്‍ത്ഥടകരും ഇത്തരത്തില്‍ ഉള്‍പ്പെടുന്നുണ്ട്.

Strict inspection of drugs entering Saudi Arabia, jail time if violated