പ്ലസ് വൺ വിദ്യാർഥിനിയുടെ ദുരൂഹ മരണം; കരാട്ടെ പരിശീലകൻ അറസ്റ്റിൽ

മലപ്പുറം: എടവണ്ണപ്പാറയിലെ പ്ലസ് വൺ വിദ്യാർഥിനിയെ പുഴയിൽ മരിച്ച നിലയിൽ കണ്ടെത്തിയ സംഭവത്തിൽ കരാട്ടെ പരിശീലകൻ അറസ്റ്റിൽ. സിദ്ദീഖ് അലി എന്നയാളെയാണ് വാഴക്കാട് പൊലിസ് അറസ്റ്റ് ചെയ്തത്. വിദ്യാർഥിനിയെ ഇയാൾ പീഡിപ്പിച്ചെന്ന കുടുംബത്തിന്റെ പരാതിയുടെ അടിസ്ഥാനത്തിലാണ് അറസ്റ്റ്. ഇയാൾക്കെതിരെ മരിച്ച വിദ്യാർഥിനി തന്നെ പരാതി നൽകിയിരുന്നു.

തിങ്കളാഴ്ച വൈകീട്ട് ആറ് മണിയോടെയാണ് വാഴക്കാട് മപ്രം മുട്ടുങ്ങൽ കടവിൽ വിദ്യാർഥിനിയെ മരിച്ച നിലയിൽ കണ്ടെത്തിയത്. കുട്ടിയെ സിദ്ദീഖ് അലി പീഡിപ്പിച്ചിരുന്നതായും ഇതിൽ പെൺകുട്ടി പൊലിസിന് പരാതി നൽകിയിരുന്നെന്നും കുടുംബം പറയുന്നു. എന്നാൽ മാനസിക സമ്മർദ്ദം മൂലം മൊഴി നൽകാൻ കഴിഞ്ഞില്ല. ഇതിന് പിന്നാലെയാണ് മരിച്ച നിലയിൽ കണ്ടത്തിയത്.

ഒന്നര അടി മാത്രം വെള്ളം ഉള്ള പുഴയിൽ നിന്നാണ് പെൺകുട്ടിയുടെ മൃതദേഹം ലഭിച്ചത്. ഷാളും മേൽവസ്ത്രവും ധരിച്ച് പോയ പെൺകുട്ടിയുടെ മൃതദേഹത്തിൽ നിന്ന് നഷ്ടമായിരുന്നു. ഈ സംഭവങ്ങൾക്ക് പിന്നാലെയാണ് മരണത്തിൽ ദുരൂഹത ചൂണ്ടിക്കാട്ടി പെൺകുട്ടിയുടെ പിതാവ് കരാട്ടെ പരിശീലകനെതിരെ വാഴക്കാട് പൊലിസിന് പരാതി നൽകിയത്.

പരിശീലകൻ പെൺകുട്ടിയോട് അപമര്യാദയായി പെരുമാറിയതിനാൽ പെൺകുട്ടി മാനസികമായി തളർന്നിരുന്നെന്നും, സംഭവത്തിലെ പ്രതിയെ പിടികൂടണമെന്നും പരാതിയിൽ പറയുന്നു. പ്രതിയെ ഉടൻ പിടികൂടണമെന്ന് ആവശ്യപ്പെട്ട് നാട്ടുകാർ ആക്ഷൻ കമ്മിറ്റിക്ക് രൂപം നൽകിയിരുന്നു. ഇ.ടി. മുഹമ്മദ് ബഷീർ എം.പി ചെയർമാനായാണ് കമ്മിറ്റി രൂപവത്കരിച്ചത്.