കോഴിക്കോട്: കൊവിഡ് കാലത്തെ ദുരിതങ്ങളില്‍ നിന്ന് പതിയെ മുന്നേറി പുതുവര്‍ഷത്തില്‍ സര്‍വിസുകള്‍ ഭൂരിഭാഗവും പുനഃസ്ഥാപിക്കുമെന്ന് കെ.എസ്.ആര്‍.ടി.സി പറയുമ്പോഴും സംസ്ഥാനത്ത് ഓടാനുള്ള ബസുകളുടെ എണ്ണത്തില്‍ വന്‍ കുറവ്. വിവിധ ഡിപ്പോകളില്‍ ബസ് സര്‍വിസുകള്‍ കുറയുന്നതിനു പ്രധാന കാരണം ടയര്‍ ലഭ്യതക്കുറവാണ്. 

വിവിധ ഇടങ്ങളില്‍ ടയറില്ലാതെ കട്ടപ്പുറത്തായ ബസുകളുടെ എണ്ണം നിരവധിയാണ്. മലബാര്‍ മേഖലയിലാണ് പ്രതിസന്ധി ഏറ്റവും രൂക്ഷം. വയനാട്ടിലെ മാനന്തവാടി ഡിപ്പോയില്‍  25ഓളം ബസുകള്‍ ടയറില്ലാത്തതിനാല്‍ ഓടുന്നില്ല. ഇതേപോലെ വിവിധ ഡിപ്പോകളില്‍ ടയറില്ലാത്തതിനാല്‍ നിരവധി വണ്ടികള്‍ ഓടാനാവാതെ കിടക്കുന്നു. 

പലതവണ റീസോളിങ് നടത്തി പരമാവധി ഉപയോഗിച്ചുകഴിഞ്ഞ ടയറുകളാണ് മിക്ക വണ്ടികള്‍ക്കുമുള്ളത്. പത്തും പതിനഞ്ചും വര്‍ഷങ്ങളോളം ഓടി നടുവൊടിഞ്ഞുകിടക്കുന്ന ബസുകളുടെ പ്രവര്‍ത്തനം തന്നെ അവതാളത്തിലായ അവസ്ഥയുള്ളപ്പോഴാണ് ടയറില്ലാതായതും. കൊവിഡ് കാലത്തിനു മുമ്പ് 4,700 സര്‍വിസുകള്‍ വരെ പ്രതിദിനം കെ.എസ്.ആര്‍.ടി.സി നടത്തിയിരുന്നു. ഇപ്പോള്‍ 3,500 ഷെഡ്യൂളുകള്‍ വരെ നടത്തുന്നുണ്ട്. 

 കൊവിഡ് കാലത്ത് സ്വകാര്യ ബസുകളുടെ സര്‍വിസ് നിര്‍ത്തിയതോടെ നാട്ടിന്‍പുറങ്ങളിലെ സാധാരണക്കാരുടെ യാത്ര ഏറെ ദുരിതത്തിലാണ്. 

ഉള്‍നാടുകളിലേക്കുണ്ടായിരുന്ന കെ.എസ്.ആര്‍.ടി.സി സര്‍വിസുകള്‍ ഭൂരിഭാഗവും പുനരാരംഭിച്ചിട്ടില്ല. ബസുകള്‍ ലഭ്യമല്ലാത്തതു തന്നെയാണ് ഇതിനു പ്രധാന കാരണം. തദ്ദേശ തെരഞ്ഞെടുപ്പുകളില്‍ പുതിയ ഭരണാധിപര്‍ അധികാരമേറ്റതോടെ ഡിപ്പോകളിലെ മാനേജര്‍മാര്‍ക്ക് നിരന്തരം ഫോണ്‍വിളികളും അന്വേഷണങ്ങളും വന്നുകൊണ്ടിരിക്കുന്നുണ്ട്. 

തങ്ങളുടെ പ്രദേശങ്ങളില്‍ നേരത്തെയുണ്ടായിരുന്ന കെ.എസ്.ആര്‍.ടി.സി സര്‍വിസുകള്‍ പുനരാരംഭിക്കണമെന്ന ആവശ്യമാണ് ജനപ്രതിനിധികള്‍ ഉന്നയിക്കുന്നത്. കോഴിക്കോട് ജില്ലയില്‍ കെ.എസ്.ആര്‍.ടി.സിയുടെ പ്രധാന ഡിപ്പോകളിലൊന്നായ തൊട്ടില്‍പാലത്ത് നിലവില്‍ 31 സര്‍വിസുകള്‍ പുനരാരംഭിച്ചെങ്കിലും ആവശ്യത്തിന് ബസില്ലാത്ത അവസ്ഥയുണ്ട്. അഞ്ചു ബസുകള്‍ ഇവിടെയും ടയര്‍ ക്ഷാമത്താല്‍ കട്ടപ്പുറത്താണ്. അതിനിടെ കെ.എസ്.ആര്‍.ടി.സി യുടെ പുതിയ കമ്പനിയായ കെ. സ്വിഫ്റ്റ് പ്രവര്‍ത്തനമാരംഭിക്കുന്നതോടെ ഓഡിനറി സര്‍വിസുകളുടെ കാര്യം ഏറെ പ്രയാസത്തിലാകുമെന്ന ആശങ്കയും നിലനില്‍ക്കുകയാണ്. സൂപ്പര്‍ ക്ലാസ് സര്‍വിസുകള്‍ അതിലേക്കു മാറുന്നതോടെ സാധാരണ സര്‍വിസുകളുടെ അവസ്ഥ ഇപ്പോഴത്തേതിലും പരിതാപകരമാകുമെന്ന ആശങ്കയുമുണ്ട്.