തിരുവനന്തപുരം: കൊവിഡിന്റെ ബ്രിട്ടനില്‍ കണ്ടെത്തിയ അതിതീവ്ര ജനിതക വകഭേദമായ സാര്‍സ് കൊവിഡ് 2 കേരളത്തിലും സ്ഥിരീകരിച്ചു. യു.കെയില്‍ നിന്നെത്തിയ ആറുപേര്‍ക്കാണ് അതിതീവ്ര വൈറസ് സ്ഥിരീകരിച്ചതെന്ന് ആരോഗ്യവകുപ്പ് മന്ത്രി കെ.കെ ശൈലജ പറഞ്ഞു. കോഴിക്കോട് 2, ആലപ്പുഴ 2, കോട്ടയം 1, കണ്ണൂര്‍ 1 എന്നിങ്ങനെയാണ് വൈറസ് ബാധ. കോഴിക്കോട് സ്വദേശി (35), കോഴിക്കോട് സ്വദേശിനി (2), ആലപ്പുഴ സ്വദേശിനി (30), ആലപ്പുഴ സ്വദേശി (36), കോട്ടയം സ്വദേശിനി (20), കണ്ണൂര്‍ സ്വദേശി (29) എന്നിവരാണിവര്‍. ഇവരെല്ലാം തന്നെ ചികിത്സയിലാണ്. ഇവരുമായി സമ്പര്‍ക്കമുള്ളവര്‍ ആരോഗ്യ വകുപ്പിന്റെ നിരീക്ഷണത്തിലുമാണ്. എല്ലാവരുടെയും സമ്പര്‍ക്ക ലിസ്റ്റ് തയാറാക്കി വരുന്നുവെന്നും ആശങ്കപ്പെടേണ്ട കാര്യമില്ലെന്നും എന്നാല്‍ ജാഗ്രത അത്യാവശ്യമാണെന്നും മന്ത്രി പറഞ്ഞു.

യു.കെ.യില്‍ നിന്നും വന്ന 39 പേര്‍ക്കാണ് ഇതുവരെ കൊവിഡ് സ്ഥിരീകരിച്ചത്. ഇവരുടെ സാമ്പിളുകള്‍ തുടര്‍പരിശോധനക്കായി എന്‍.ഐവി പൂനെയിലേക്ക് അയച്ചിരുന്നു. അതില്‍ ആറുപേരിലാണ് ജനിതക മാറ്റം വന്ന വൈറസിന്റെ വകഭേദം കണ്ടെത്തിയത്. 

പുതിയ ജനിതക വകഭേദം വന്ന വൈറസിന് പകരാനുള്ള സാധ്യത വളരെ കൂടുതലാണെന്ന് മന്ത്രി പറഞ്ഞു. എല്ലാവരും സ്വമേധയാ വെളിപ്പെടുത്തലിന് തയാറാകണമെന്നും മാസ്‌ക് ധരിക്കുക, ഇടയ്ക്കിടയ്ക്ക് കൈകള്‍ ശുചിയാക്കുക, സാമൂഹിക അകലം പാലിക്കുക എന്നിവ ഇനിയും തുടരണമെന്നും മന്ത്രി അറിയിച്ചു.

പുതിയ വൈറസ് കേരളത്തില്‍ സ്ഥിരീകരിച്ച സാഹചര്യത്തില്‍ എയര്‍പോര്‍ട്ടിലും സീപോര്‍ട്ടിലും നിരീക്ഷണം ശക്തമാക്കിയിട്ടുണ്ട്. എയര്‍പോര്‍ട്ടിനോടനുബന്ധിച്ചുള്ള കൊവിഡ് പരിശോധനാ സംവിധാനവും ശക്തിപ്പെടുത്തിയിട്ടുണ്ട്. യൂറോപ്യന്‍ രാജ്യങ്ങളില്‍നിന്നും വന്നവരെ കണ്ടെത്തി നിരീക്ഷിച്ചുവരികയാണെന്നും ക്വാറന്റൈനിലുള്ളവര്‍ നിര്‍ദേശങ്ങള്‍ കര്‍ശനമായി പാലിക്കേണ്ടതാണെന്നും മന്ത്രി വ്യക്തമാക്കി.