റിയാദ്: സഊദിയിൽ നടക്കുന്ന ദാകാർ റാലിയിൽ പങ്കെടുത്ത ഇന്ത്യൻ താരം ഗുരുതരാവസ്ഥയിൽ. പ്രശസ്ത ഇന്ത്യന്‍ ബൈക്ക് റേസിങ് താരം സി.എസ് സന്തോഷാണ് അപകടത്തെ തുടർന്ന് ആശുപത്രിയിൽ ഗുരുതരാവസ്ഥയിൽ കഴിയുന്നത്. നിലവിൽ അബോധാവസ്ഥയിലാണ് ഇദ്ദേഹമെന്നാണ് റിപ്പോർട്ടുകൾ. ബുധനാഴ്ചയായിരുന്നു അപകടം. അപകടത്തില്‍ സന്തോഷിന്റെ തലയ്ക്ക് ഗുരുതര പരിക്കുണ്ട്. അപകടം നടന്നതിനു പിന്നാലെ പാരാമെഡിക്കല്‍ സംഘമെത്തി ആശുപത്രിയിലേക്ക് മാറ്റുന്ന സമയത്ത് അദ്ദേഹത്തിന് ബോധമുണ്ടായിരുന്നുവെന്ന് റിപോര്‍ട്ടുകളില്‍ പറയുന്നു.

     ലോകത്തിലെ ഏറ്റവും കഠിനമായ ഓഫ് റോഡ് മോട്ടോര്‍ സ്‌പോര്‍ട് ഇവന്റായി കണക്കാക്കപ്പെടുന്ന ദാകർ റാലിയാണ് സഊദിയിൽ നടക്കുന്നത്. 37കാരനായ സന്തോഷ് ഹീറോ മോട്ടോ സ്‌പോര്‍ട്‌സിനെ പ്രതിനിധീകരിച്ചാണ് പങ്കെടുത്തത്. ലോകത്തിലെ തന്നെ ഏറ്റവും വലിയ റാലികളിലൊന്നായാണ് ദാകർ റാലി അറിയപ്പെടുന്നത്.  കഴിഞ്ഞ വര്‍ഷം ദാകർ റാലിയില്‍ മത്സരിക്കുന്നതിനിടെ ഹീറോ മോട്ടോസ്‌പോര്‍ട്ട് റൈഡര്‍ പൗലോ ഗോണ്‍കാല്‍വസ് അപകടത്തില്‍പ്പെട്ട് മരിച്ചിരുന്നു. ദാകർ റാലിയില്‍ ഇത് ഏഴാമത്തെ തവണയാണ് സന്തോഷ് പങ്കെടുക്കുന്നത്. ദാകർ റാലിയുടെ 43 ആമത് എഡിഷനാണ് സഊദിയിൽ നടക്കുന്നത്. ഈ മാസം മൂന്നിന് ആരംഭിച്ച റാലി പതിനഞ്ചു വരെ നീണ്ടു നിൽക്കും.