കൊച്ചി
ആശുപത്രികളുടെ ശോച്യാവസ്ഥ കൊട്ടിഘോഷിക്കപ്പെട്ട കേരള മോഡലിന് നാണക്കേടാണെന്നും നേട്ടങ്ങളെക്കുറിച്ച് പറയുമ്പോള്‍ ഇതുകൂടി മനസിലാക്കണമെന്നും ഹൈക്കോടതി.
പീരുമേട് താലൂക്ക് ആശുപത്രിയിലെ പ്രസവ വാര്‍ഡിന്റെ അപര്യാപ്തതകള്‍ ചൂണ്ടിക്കാട്ടി സമര്‍പ്പിച്ച ഹരജിയിലാണ് സംസ്ഥാന സര്‍ക്കാരിനെ കോടതി രൂക്ഷമായി വിമര്‍ശിച്ചത്.
താലൂക്ക് ആശുപത്രിയിലെ പ്രസവ വാര്‍ഡിന്റെ ശോച്യാവസ്ഥ പരിഹരിക്കുന്നതിന് ആരോഗ്യവകുപ്പിന് നിര്‍ദേശം നല്‍കണമെന്ന് ഹരജിഭാഗം അഭിഭാഷകൻ ആര്‍. രാജശേഖരന്‍പിള്ള കോടതിയില്‍ ആവശ്യപ്പെട്ടു.
2021 ഡിസംബര്‍ 14ന് ആശുപത്രിയുടെ സ്ഥിതിവിവരം ബോധിപ്പിക്കുന്നതിനു സര്‍ക്കാരിന് കോടതി നിര്‍ദേശം നല്‍കിയിരുന്നെങ്കിലും റിപ്പോര്‍ട്ട് സമര്‍പ്പിച്ചിരുന്നില്ല. ഇതും കോടതിയുടെ വിമർശനത്തിനിടയാക്കി. തുടർന്ന് എത്രയുംപെട്ടെന്ന് റിപ്പോര്‍ട്ട് സമര്‍പ്പിക്കണമെന്ന് സര്‍ക്കാര്‍ അഭിഭാഷകനോട് കോടതി നിര്‍ദേശിച്ചു. ജസ്റ്റിസ് എന്‍. നഗരേഷാണ് ഹരജി പരിഗണിച്ചത്.