തിരുവനന്തപുരം: നിയമസഭാ തെരഞ്ഞെടുപ്പിലെ സീറ്റ് വിഭജന ചര്‍ച്ചകള്‍ക്ക് തുടക്കമിട്ട ഇന്നലത്തെ യു.ഡി.എഫ് യോഗത്തില്‍ പി.സി ജോര്‍ജിന്റെ മുന്നണി പ്രവേശനം ചര്‍ച്ചയായില്ല.
ജോര്‍ജ് ഔദ്യോഗികമായി സമീപിച്ചിട്ടില്ലെന്നും അതുകൊണ്ടു തന്നെ ചര്‍ച്ച ചെയ്യേണ്ട സാഹചര്യം ഇപ്പോഴില്ലെന്നും പ്രതിപക്ഷനേതാവ് രമേശ് ചെന്നിത്തല പറഞ്ഞു. യു.ഡി.എഫ് വിപുലീകരിക്കുന്നത് സംബന്ധിച്ച് എന്‍.സി.പിയുടെ തീരുമാനം അറിഞ്ഞ ശേഷം മാത്രം ചര്‍ച്ച നടത്തിയാല്‍ മതിയെന്നാണ് നേതാക്കള്‍ക്കിടയിലെ ധാരണ.
തദ്ദേശ തെരഞ്ഞെടുപ്പിലെ തിരിച്ചടിക്കു ശേഷം മാറ്റങ്ങളുണ്ടാകുമെന്ന് പറഞ്ഞിരുന്നെങ്കിലും ഇതു ദൃശ്യമല്ലെന്ന് യു.ഡി.എഫ് യോഗത്തില്‍ ആര്‍.എസ്.പി അടക്കമുള്ളവര്‍ പരാതിപ്പെട്ടു.
എ.ഐ.സി.സി റിപ്പോര്‍ട്ടിനു ശേഷം മാറ്റങ്ങളുണ്ടാകുമെന്നായിരുന്നു കോണ്‍ഗ്രസ് നേതാക്കളുടെ മറുപടി. സാമുദായിക കക്ഷികളുമായി നടത്തിയ ചര്‍ച്ചകള്‍ ഫലപ്രദമാണെന്ന് യോഗം വിലയിരുത്തി.