കണ്ണൂര്‍: ഓണ്‍ലൈന്‍ മദ്യവില്‍പ്പനയ്ക്ക് നിയമപരമായി അംഗീകാരം നല്‍കാനാകില്ലെന്ന് എക്‌സൈസ് കമ്മിഷണര്‍ ഋഷിരാജ് സിങ്. എക്‌സൈസ് നിയമത്തിന്റെ പരിധിയില്‍ ഓണ്‍ലൈന്‍ വില്‍പ്പന വരില്ല. ഇക്കാര്യത്തില്‍ സര്‍ക്കാര്‍ എക്‌സൈസ് വകുപ്പിനോട് അഭിപ്രായംചോദിച്ചാല്‍ നിലപാട് അറിയിക്കുമെന്നും അദ്ദേഹം കണ്ണൂരില്‍ പറഞ്ഞു.

ഔട്ട്‌ലറ്റുകളില്‍ പണംനല്‍കി മദ്യം നല്‍കണമെന്നാണ് എക്‌സൈസ് നിയമത്തില്‍ പറയുന്നത്. 21 വയസ് തികയാത്തവര്‍ക്ക് മദ്യംനല്‍കാന്‍ പാടില്ലെന്ന നിയമം ഓണ്‍ലൈന്‍വഴി മദ്യം നല്‍കുന്നതിലൂടെ ഇല്ലാതാകുമെന്നും അദ്ദേഹം പറഞ്ഞു.

ഈ ഓണക്കാലം മുതല്‍ മദ്യവില്‍പ്പന ഓണ്‍ലൈന്‍ വഴിയെന്ന് കണ്‍സ്യൂമര്‍ഫെഡ് ചെയര്‍മാന്‍ എം മെഹബൂബ് നേരത്തെ പറഞ്ഞിരുന്നു. ഓണ്‍ലൈനില്‍ രജിസ്റ്റര്‍ ചെയ്യുന്ന ഉപഭോക്താക്കള്‍ക്കും സഹായികള്‍ക്കും രജിസ്‌ട്രേഷന്‍ സ്ലിപ്പുമായി ഔട്ട്‌ലറ്റിലെ പ്രത്യേക കൗണ്ടറിലെത്തി മദ്യം വാങ്ങാനാവുമെന്നും അദ്ദേഹം പറഞ്ഞിരുന്നു.