റാബിക്: സഊദിയിലെ റാബിഗിൽ പാലക്കാട് സ്വദേശി ഹൃദയാഘാതം മൂലം മരണപ്പെട്ടു. മസ്തൂറ പെട്രോൾ പമ്പിൽ ജോലി ചെയ്യുകയായിരുന്ന പാലക്കാട് കോങ്ങാട് സ്വദേശി കായപ്പഞ്ചേരി കുണ്ടിൽ അയമുട്ടി മകൻ മുഹമ്മദലിയാണ് മരണപ്പെട്ടത്. കഴിഞ്ഞ ചൊവ്വാഴ്ച പുലർച്ചെ ജോലിക്കിടെ പെട്ടെന്ന് വേദന അനുഭവപ്പെടുകയായിരുന്നു. ഉടൻ തന്നെ ആംബുലൻസിൽ തൊട്ടടുത്തുള്ള റാബിക് ഗവൺമെൻറ് ഹോസ്പിറ്റലിൽ എത്തിച്ചപ്പോഴേക്കും മരണം സംഭവിച്ചിരുന്നു.

     വ്യാഴാഴ്ച വൈകുന്നേരം അസർ നിസ്കാരത്തിനു ശേഷം റാബിക് സുലൈഫ് ഖബർസ്ഥാനിൽ മയ്യത്ത് ഖബറടക്കി. മരണാനന്തര നടപടികൾക്കും മയ്യത്ത് മറവ് ചെയ്യുന്നതിനും റാബിക് കെഎംസിസി വെൽഫെയർ വിങ്ങ് നേതാക്കളായ സയ്യിദ് കുഞ്ഞിക്കോയ തങ്ങൾ, മുസ്തഫ വലിയപറമ്പ്, തൗഹാദ് മേൽമുറി, ഹംസ കപൂർ, മുസ്തഫ ദാരിമി, മുഹമ്മദലിയുടെ കഫീൽ, ജിദ്ദ വെൽഫെയർ വിങ്ങ് ചെയർമാൻ മുഹമ്മദ് കുട്ടിക്ക, മുഹമ്മദലിയുടെ ബദ്ധു മൊയ്തീൻ കുട്ടി, തുടങ്ങിയവർ നേതൃത്വം നൽകി.