ലഖ്‌നൗ
ഉത്തർപ്രദേശിൽ നിർണായക നിയമസഭാ തെരഞ്ഞെടുപ്പ് നടക്കാനിരിക്കെ വിവിധയിടങ്ങളിൽ ബി.ജെ.പിക്കെതിരേ ജനകീയ പ്രതിഷേധങ്ങൾ. പടിഞ്ഞാറൻ യു.പിയിൽ ബി.ജെ.പി സ്ഥാനാർഥികൾക്കെതിരേ നടന്ന പ്രതിഷേധങ്ങളിൽ പൊലിസ് കേസെടുത്തിട്ടുണ്ട്. ഇവിടെ ബി.ജെ.പി സ്ഥാനാർഥികളെ ഗ്രാമീണർ കരിങ്കൊടി കാണിക്കുകയും സ്ഥാനാർഥികൾക്കും നേതാക്കൾക്കും നേരെ കല്ലെറിയുകയും ചെയ്തു. ചിലയിടങ്ങളിൽ ബി.ജെ.പി നേതാക്കൾക്കു നേരെ ചെളിയെറിഞ്ഞും പ്രതിഷേധിച്ചു.
പടിഞ്ഞാറൻ യു.പിയിൽ കഴിഞ്ഞ ദിവസങ്ങളിൽ മാത്രം ഇത്തരം പത്തോളം സംഭവങ്ങളാണ് അരങ്ങേറിയത്. ഫെബ്രുവരി പത്തിനും പതിനാലിനുമായാണ് പടിഞ്ഞാറൻ യു.പിയിൽ തെരഞ്ഞെടുപ്പ് നടക്കുന്നത്.
ചൂർ ഗ്രാമത്തിൽ ബി.ജെ.പിയുടെ സിവൽഖാസ് മണ്ഡലം സ്ഥാനാർഥി മനീന്ദർപാൽ സിങ്ങിനെതിരേ ആക്രമണമുണ്ടായി. ജനുവരി 24നു നടന്ന സംഭവത്തിൽ സ്ഥാനാർഥി പരാതി നൽകിയിട്ടില്ലെങ്കിലും കണ്ടാലറിയാവുന്ന നൂറോളം പേർക്കെതിരേ പൊലിസ് കേസെടുത്തിട്ടുണ്ട്. ഈ സംഭവത്തിൽ സ്ഥാനാർഥിയുടേതടക്കമുള്ള ഏഴു കാറുകൾ കേടായിട്ടുമുണ്ട്.

പടിഞ്ഞാറൻ യു.പിയിൽ 2017ൽ ബി.ജെ.പിക്കു കാര്യങ്ങൾ എളുപ്പമായിരുന്നെങ്കിലും ഇപ്പോൾ പാർട്ടി അവിടെ തിരിച്ചടി നേരിടുന്നതായാണ് സൂചന. കർഷകർ അടക്കമുള്ളവർ ബി.ജെ.പിക്കെതിരേ പരസ്യമായി രംഗത്തെത്തിയിട്ടുണ്ട്.
മുസഫർ നഗറിലെ ഖത്വാലിയിൽ ബി.ജെ.പി സ്ഥാനാർഥിയായ വിക്രം സൈനിക്കെതിരേയും കഴിഞ്ഞ ദിവസം കർഷകരുടെ നേതൃത്വത്തിൽ പ്രതിഷേധമുണ്ടായി. ദിവസങ്ങൾക്കു മുൻപും ഇതേ മണ്ഡലത്തിൽ സൈനിക്കെതിരേ സമാന പ്രതിഷേധം നടന്നിരുന്നു. ഭാഗ്പതിലെ ചപ്രോലി മണ്ഡലത്തിലെ ബി.ജെ.പി സ്ഥാനാർഥി സഹേന്ദ്ര രാമലയ്ക്കു നേരെ കഴിഞ്ഞ ദിവസം ദാഹ ഗ്രാമത്തിൽ വച്ച് പ്രതിഷേധമുണ്ടായി.
ഇത്തരം സംഭവങ്ങൾക്കു പിന്നിൽ പ്രതിപക്ഷമാണെന്നാണ് ബി.ജെ.പി നേതാക്കൾ ആരോപിക്കുന്നത്. എന്നാൽ, ജനങ്ങളാണ് പ്രതിഷേധിക്കുന്നതെന്നാണ് പ്രതിപക്ഷ പാർട്ടികൾ വ്യക്തമാക്കുന്നത്.