തിരുവനന്തപുരം: മാധ്യമപ്രവര്‍ത്തകന്‍ കെ.എം ബഷീര്‍ കൊല്ലപ്പെട്ട സംഭവത്തില്‍ അപകടത്തിന്റെ സി.സി.ടി.വി ദൃശ്യങ്ങള്‍ മുഖ്യപ്രതിയായ ശ്രീറാം വെങ്കിട്ടരാമന് നല്‍കാമെന്ന് കോടതി. ജുഡീഷ്യന്‍ ഫസ്റ്റ്ക്ലാസ് മജിസ്‌ട്രേറ്റ് കോടതിയാണ് നിര്‍ദേശം നല്‍കിയത്.

ദൃശ്യങ്ങളുടെ പകര്‍പ്പാണ് പ്രതിയായ ശ്രീറാം വെങ്കിട്ട രാമിന് നല്‍കാന്‍ കോടതി നിര്‍ദേശം നല്‍കിയത്. പകര്‍പ്പ് നല്‍കുന്നതിന് സാങ്കേതിക തടസമില്ലെന്ന് ഫൊറന്‍സിക് ഡയറക്ടര്‍ കോടതിയെ അറിയിച്ചു.

 

പകര്‍പ്പ് നല്‍കാന്‍ സൈബര്‍ സെല്‍ ഡി.വൈഎസ്.പി നടപടി സ്വീകരിക്കണമെന്നും കോടതി നിര്‍ദേശിച്ചു. 

അപകടസമയത്തെ സിസിടിവി ദൃശ്യങ്ങള്‍ പകര്‍ത്തിയ രണ്ടു ഡിവിഡികള്‍ പ്രതികള്‍ക്ക് നല്‍കും മുമ്പ് കോടതിയില്‍ പ്രദര്‍ശിപ്പിച്ചാല്‍ തെളിവിന്റെ പവിത്രത നഷ്ടപ്പെടുന്ന അവസ്ഥയായ ഹാഷ് വാല്യു മാറ്റം വരില്ലേയെന്ന് കോടതി സംശയം പ്രകടിപ്പിച്ചിരുന്നു. അപ്രകാരം സംഭവിച്ചാല്‍ പ്രതികള്‍ക്ക് നല്‍കേണ്ട അടയാളസഹിതം പകര്‍പ്പില്‍ കൃത്രിമം നടന്നുവെന്ന് പ്രതികള്‍ വിചാരണക്കോടതിയില്‍ തര്‍ക്കമുന്നയിക്കില്ലേയെന്നും കോടതി ആരാഞ്ഞിരുന്നു. പകര്‍പ്പ് നല്‍കും മുമ്പ് ഡിവിഡികളുടെ കൃത്യത വിചാരണവേളയില്‍ തര്‍ക്കം ഉന്നയിക്കില്ലായെന്ന സത്യവാങ്മൂലം പ്രതികള്‍ സമര്‍പ്പിക്കണമെന്നും കോടതി വ്യക്തമാക്കി. 

2019 ഓഗസ്റ്റ് 3ന് പുലര്‍ച്ചെയാണു ഐ.എ.എസ് ഉദ്യോഗസ്ഥനായ ശ്രീറാം വെങ്കിട്ടരാമനും സുഹൃത്തായ വഫ ഫിറോസും സഞ്ചരിച്ചിരുന്ന കാര്‍ മ്യൂസിയത്തിനു മുന്നിലെ റോഡില്‍ ബഷീറിനെ ഇടിച്ചു വീഴ്ത്തിയത്. മനഃപൂര്‍വമല്ലാത്ത നരഹത്യ, തെളിവ് നശിപ്പിക്കല്‍, മോട്ടര്‍ വാഹന നിയമ ലംഘനം, പൊതുമുതല്‍ നശിപ്പിക്കല്‍ എന്നീ വകുപ്പുകളാണു പ്രതികള്‍ക്കെതിരേ ചുമത്തിയിട്ടുള്ളത്.