റിയാദ്: തൊഴിലാളികൾക്കും പ്രാർത്ഥനക്കെത്തിയവർക്കും വൈറസ് ബാധ കണ്ടെത്തിയതിനെ തുടർന്ന് രാജ്യത്ത് വിവിധ പ്രവിശ്യകളിലായി പത്ത് പള്ളികൾ താത്കാലികമായി അടച്ചതായി സഊദി ഇസ്‌ലാമിക കാര്യ മന്ത്രാലയം അറിയിച്ചു. അണുനശീകരണത്തിന്റെ ഭാഗമായാണ് നടപടി. റിയാദ് പ്രവിശ്യയിൽ അഞ്ച് പള്ളികൾ അടച്ചു. ഇതിൽ മൂന്നെണ്ണം ഹുറൈമല ഗവർണറേറ്റിലും മറ്റുള്ളവ അഫ്ലജ്, ദിലം ഗവർണറേറ്റുകളിലുമാണ്. ദിലം ഗവർണറേറ്റിൽ ആറ് തൊഴിലാളികൾക്കാണ് വൈറസ് ബാധ കണ്ടെത്തിയിട്ടുള്ളത്.

 

      അൽബാഹയിലെ അൽ മൻദഖ്, കിഴക്കൻ പ്രാവിശ്യയിലെ ദമാം എന്നിവിടങ്ങളിൽ ഓരോ പള്ളികളും വടക്കൻ അതിർത്തിയിൽ മൂന്ന് പള്ളികളുമാണ് താത്കാലികമായി അടക്കാൻ ഉത്തരവിട്ടത്. അണുനശികരണത്തിനായി 24 മണിക്കൂർ മുതൽ 48 മണിക്കൂർ നേരത്തെക്കാണ് അടച്ചത്. അണുനശീകരണത്തിന് ശേഷം പ്രതിരോധ പ്രവർത്തനങ്ങൾ ഉറപ്പ് വരുത്തിയ ശേഷം പള്ളികൾ തുറക്കും. പ്രതിരോധ പ്രവർത്തനങ്ങൾ ശക്തമാക്കണമെന്നും മന്ത്രാലയം നേരത്തെ പുറത്ത് വിട്ട നിർദേശങ്ങൾ പൂർണ്ണമായും പാലിക്കണമെന്നും വിശ്വാസികളോട് മന്ത്രാലയം വീണ്ടും ആവശ്യപ്പെട്ടു.