കോട്ടയം: എല്‍.ഡി.എഫ് വിട്ട മാണി സി കാപ്പന്‍ എം.എല്‍.എ യു.ഡി.എഫ് വേദിയില്‍. പ്രതിപക്ഷ നേതാവ് രമേശ് ചെന്നിത്തലയുടെ ഐശ്വര്യ കേരളയാത്രയുടെ പാലായിലെ സ്വീകരണയോഗത്തിലാണ് കാപ്പന്‍ പങ്കെടുക്കുന്നത്. ശക്തിപ്രകടനവുമായി കാപ്പനും അനുയായികളും യാത്രയ്‌ക്കൊപ്പം ചേരുകയായിരുന്നു.

മുന്‍ മുഖ്യമന്ത്രി ഉമ്മന്‍ ചാണ്ടി, പി.കെ കുഞ്ഞാലിക്കുട്ടി, പി.ജെ ജോസഫ് തുടങ്ങി എല്ലാ നേതാക്കളും വേദിയിലുണ്ടായിരുന്നു. പാര്‍ട്ടിയായി തന്നെ യു.ഡി.എഫില്‍ ചേരും. പാര്‍ട്ടി സ്ഥാനമാനങ്ങള്‍ രാജിവയ്ക്കുമെന്നും കാപ്പന്‍ വ്യക്തമാക്കി. പുതിയ പാര്‍ട്ടി പ്രഖ്യാപനം നാളെ ഉണ്ടാകുമെന്നാണ് മാണി സി കാപ്പന്‍ പറയുന്നത്.

തലയെടുപ്പുള്ള കൊമ്പനാനയെ പോലെയാണ് പാലായിലെ ജനങ്ങളുമായി മാണി സി കാപ്പന്‍ യുഡിഎഫ് വേദിയിലെത്തിയതെന്ന് പികെ കുഞ്ഞാലിക്കുട്ടി സ്വാഗതം പറഞ്ഞു. കാപ്പന്റെ വരവ് യുഡിഎഫിന്റെ വിജയത്തിനുള്ള നാന്ദിയാണ് . യുഡിഎഫിന്റെ വിജയ ജാഥയാണ് ഇനി വരാനിരിക്കുന്നതെന്നും ഇടതുമുന്നണി തോറ്റവര്‍ക്ക് സീറ്റ് എടുത്ത് നല്‍കിയെന്ന കാപ്പന്റെ ന്യായം പാലാക്കാര്‍ക്ക് മനസിലാകുമെന്നും കുഞ്ഞാലിക്കുട്ടി പറഞ്ഞു.